پشین میں پولیس کی وردی میں ملبوس ڈاکو سرگرم، شہریوں میں خوف و ہراس
پشین:ضلع پشین میں جرائم پیشہ عناصر نے پولیس کی وردی کا سہارا لے کر وارداتوں کا نیا سلسلہ شروع کر دیا ہے، جس سے علاقے میں خوف و ہراس کی فضا قائم ہے۔
تفصیلات کے مطابق دو روز قبل کلی تراٹہ کے علاقے میں پولیس وردی میں ملبوس سات مسلح افراد نے ایک مقامی شہری کے گھر میں زبردستی گھس کر خواتین سے زیورات چھین لیے اور دو موٹر سائیکلیں بھی لے کر فرار ہو گئے۔ واردات کے بعد ملزمان باآسانی موقع سے نکل گئے۔
علاقہ مکینوں نے اس افسوسناک واقعے پر شدید غم و غصے کا اظہار کرتے ہوئے مطالبہ کیا ہے کہ جعلی پولیس اہلکاروں کے خلاف فوری کارروائی کی جائے تاکہ عوام کا قانون نافذ کرنے والے اداروں پر اعتماد بحال رہے۔
پولیس ذرائع کے مطابق واقعے کی تحقیقات شروع کر دی گئی ہیں اور ملزمان کی تلاش کے لیے خصوصی ٹیم تشکیل دی گئی ہے۔
عوامی حلقوں نے آئی جی پولیس بلوچستان سے مطالبہ کیا ہے کہ پشین پولیس کے ذمہ دار افسران کے خلاف سخت کارروائی عمل میں لائی جائے، تاکہ مستقبل میں ایسے واقعات کا سدباب ہو سکے اور عوام اصلی پولیس کو جعلی عناصر سے الگ پہچان سکیں۔
