خالص سونا پہچاننا مشکل نہیں، یہ نشانیاں یاد رکھیں
لاہور (ویب ڈیسک) سونے کی بڑھتی ہوئی قیمتوں کے باعث عوام کی دلچسپی ایک بار پھر اس قیمتی دھات کی جانب بڑھ گئی ہے، تاہم خالص سونا پہچاننا آج بھی عام خریدار کے لیے ایک مشکل کام ہے۔
مارکیٹ میں ایک ہی وزن کا سونا مختلف قیمتوں پر فروخت ہو رہا ہے — کسی سیٹ کی قیمت 4 لاکھ 31 ہزار روپے سے زائد ہے، جبکہ دوسرا سیٹ 3 سے ساڑھے 3 لاکھ روپے میں دستیاب ہے۔ اس قیمت کے فرق کی بڑی وجہ کیرٹ ہے۔
ماہرین کے مطابق 18، 20 اور 22 کیرٹ سونے میں خالص سونے کی مقدار مختلف ہوتی ہے، جبکہ 24 کیرٹ سونا سب سے خالص مانا جاتا ہے۔
سناروں کا کہنا ہے کہ عام خریدار کے لیے کیرٹ کا فرق سمجھنا آسان نہیں ہوتا، جس کا فائدہ بعض غیر ذمہ دار تاجر اٹھا لیتے ہیں۔
سونا فروخت کرتے وقت بھی احتیاط ضروری ہے، کیونکہ 20 سے 30 فیصد تک کٹوتی معمول کی بات ہے۔ یہ کٹوتی زیور پگھلانے اور دوبارہ بنانے کے دوران ہونے والے نقصان کی وجہ سے کی جاتی ہے۔
ماہرین کا مشورہ ہے کہ سونا خریدتے وقت:
چمک یا ڈیزائن پر نہیں، کیرٹ اور رسید پر توجہ دیں
قیمت اور کٹوتی کی تفصیل لازمی چیک کریں
قیمت کم ہونے پر خریدنا اور زیادہ ہونے پر بیچنا سرمایہ کاری کے لحاظ سے بہتر حکمتِ عملی ہے۔
