بلوچستان حکومت کا بڑا فیصلہ،بینک آف بلوچستان کے قیام کا اعلان
کوئٹہ (نمائندہ خصوصی) بلوچستان حکومت نے صوبے کی معاشی ترقی اور عوامی سہولت کے لیے “بینک آف بلوچستان” کے قیام کا اعلان کر دیا ہے۔ وزیراعلیٰ میر سرفراز بگٹی کی زیر صدارت اجلاس میں منصوبے کی ابتدائی فیزیبلٹی رپورٹ پیش کی گئی، جسے قابلِ عمل قرار دے دیا گیا۔ وزیراعلیٰ نے ایک ہفتے کے اندر آپریشنل پلان مرتب کرنے کی ہدایت بھی جاری کی۔
میر سرفراز بگٹی نے کہا کہ بینک آف بلوچستان کے قیام سے عوام، تاجروں اور سرمایہ کاروں کو معیاری بینکنگ سہولیات میسر آئیں گی، جبکہ یہ منصوبہ صوبے میں معاشی سرگرمیوں کے فروغ کا باعث بنے گا۔ ان کے مطابق یہ اقدام صوبائی معیشت کے لیے ایک تاریخی سنگِ میل ہوگا، جس کے ذریعے نوجوانوں کے لیے روزگار کے نئے مواقع پیدا ہوں گے اور ترقیاتی منصوبوں کی رفتار بھی تیز ہو گی۔
اجلاس میں صوبائی وزیر خزانہ میر شعیب نوشیروانی، چیف سیکرٹری شکیل قادر خان، پرنسپل سیکرٹری بابر خان سمیت اعلیٰ حکام نے شرکت کی جبکہ بینکنگ سیکٹر کے ماہرین نے آن لائن شرکت کرتے ہوئے اس منصوبے کو جلد فعال بنانے پر اتفاق کیا۔
