جنرل ہیڈکوارٹر (جی ایچ کیو) میں آج چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے سبکدوشی سے قبل آرمی چیف سے الوداعی ملاقات کی۔ اس موقع پر چیف آف آرمی اسٹاف نے جنرل ساحر شمشاد مرزا کی غیر معمولی قیادت، عسکری دور اندیشی اور پاک افواج کے لیے ان کی خدمات کو سراہتے ہوئے کہا کہ انہوں نے tri-services کو مضبوط بنانے، مشترکہ دفاعی تیاریوں میں اضافہ کرنے اور قومی سلامتی کے اہداف کے حصول میں نمایاں کردار ادا کیا۔
آرمی چیف نے خطے میں استحکام، عسکری سفارت کاری اور دوست ممالک کے ساتھ پاکستان کے اسٹریٹجک روابط کو مضبوط بنانے میں جنرل ساحر کی کوششوں کی بھی تعریف کی۔
الوداعی ملاقات کے دوران جنرل ساحر شمشاد مرزا نے اپنے عسکری کیریئر کے دوران ملنے والے تعاون پر پاک فوج اور آرمی چیف کا شکریہ ادا کیا۔
اس سے قبل چیئرمین جوائنٹ چیفس نے جی ایچ کیو آمد پر یادگار شہداء پر پھول چڑے اور پاک فوج کے چاق و چوبند دستے نے انہیں گارڈ آف آنر پیش کیا۔
