بنوں آپریشن: فتنۃ الخوارج کے 22 دہشت گرد ہلاک
بنوں: سکیورٹی فورسز نے ضلع بنوں میں بھارتی پراکسی فتنۃ الخوارج کے 22 دہشت گرد ہلاک کر دیے ہیں۔ پاک فوج کے شعبہ تعلقات عامہ (آئی ایس پی آر) کے مطابق یہ کارروائی دہشت گردوں کی موجودگی کی خفیہ اطلاع پر 24 نومبر کو کی گئی۔
کارروائی کے دوران سکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا اور شدید فائرنگ کے تبادلے کے بعد 22 دہشت گرد مارے گئے۔ آئی ایس پی آر کے مطابق کارروائی کے بعد کلیئرنس اور سینیٹائزیشن آپریشن جاری ہے تاکہ کسی بھی روپوش بھارتی سرپرستی یافتہ دہشت گرد کو گرفتار یا ختم کیا جا سکے۔
آئی ایس پی آر نے کہا کہ نیشنل ایکشن پلان اور فیڈرل ایپکس کمیٹی کے وژن عزمِ استحکام کے تحت پاک فوج اور قانون نافذ کرنے والے اداروں کی انسداد دہشت گردی مہم پوری رفتار سے جاری ہے اور ملک سے بیرونی سرپرستی یافتہ دہشت گردی کا مکمل خاتمہ یقینی بنایا جائے گا۔
صدر، وزیراعظم اور وفاقی وزیر داخلہ کا خراج تحسین
صدر مملکت آصف علی زرداری نے اس کارروائی کو سراہتے ہوئے کہا کہ بھارتی پشت پناہی میں سرگرم دہشت گردوں کا قلع قمع ریاست کی اولین ترجیح ہے۔ انہوں نے آپریشن کے دوران جراتمند جوانوں کو سلام پیش کیا اور کہا کہ شہدا اور غازی قوم کا فخر ہیں۔
وزیراعظم شہباز شریف نے بھی دہشت گردوں کے خلاف کامیاب کارروائی پر سکیورٹی فورسز کو خراج تحسین پیش کیا اور کہا کہ پوری قوم دہشت گردی کے خلاف اس جنگ میں پاکستان کی افواج کے ساتھ کھڑی ہے۔
وفاقی وزیر داخلہ محسن نقوی نے کہا کہ خیبرپختونخوا میں دہشت گردی کے ناسور کے خاتمے کے لیے سکیورٹی فورسز کی کامیاب کارروائیاں لائق تحسین ہیں۔ انہوں نے کہا کہ پاکستان سے فتنۃ الہندوستان اور ان کے سہولت کاروں کا مکمل صفایا کیا جا رہا ہے اور قوم کو اپنے بہادر فورسز پر فخر ہے۔
