پاکستان نے افغانستان میں مبینہ فضائی حملوں کے الزامات کو بے بنیاد قرار دیتے ہوئے واضح کیا ہے کہ گزشتہ دنوں افغان سرزمین پر کوئی فضائی کارروائی نہیں کی گئی۔
سیکیورٹی ذرائع کے مطابق پاکستان جب بھی کوئی آپریشن کرتا ہے تو اسے سرکاری سطح پر تسلیم بھی کرتا ہے، اس لیے افغان حکام یا سوشل میڈیا پر سامنے آنے والے دعووں کی کوئی حقیقت نہیں۔ ذرائع کا کہنا ہے کہ جن افغان علاقوں سے دھماکوں یا حملوں کی اطلاعات سامنے آئیں، وہ زیادہ تر اندرونی جھگڑوں، مقامی گروہوں کے تصادم یا بعض صورتوں میں بھارتی ایجنٹوں کی جانب سے گھڑائے گئے ڈراموں کا نتیجہ ہو سکتے ہیں۔ حکام کے مطابق افغانستان میں خوارج کے اندر بھارتی رسوخ کوئی نئی بات نہیں۔
ذرائع نے کہا کہ افغان حکومت اکثر اپنے داخلی مسائل کا الزام پاکستان پر ڈال دیتی ہے، اور اس بار بھی یہی طریقہ اپنایا گیا ہے۔ انہوں نے بتایا کہ سوشل میڈیا پر گردش کرنے والی زیادہ تر تصاویر پرانی، غیر متعلقہ یا ایڈٹ شدہ ہیں، جن کا زمینی حقائق سے کوئی تعلق نہیں۔
حکام کے مطابق افغانستان اس وقت شدید علاقائی اور داخلی دباؤ کا شکار ہے اور پاکستان کی جانب سے ممکنہ جواب سے بھی خوفزدہ ہے، خاص طور پر اسلام آباد، وانا کالج اور پشاور حملوں کے بعد۔ اسی لیے افغان حکام پیشگی الزامات لگا کر عالمی توجہ کو بھٹکانے کی کوشش کر رہے ہیں۔
پاکستانی حکام نے کہا کہ اگر پاکستان کوئی کارروائی کرے گا تو دنیا خود دیکھ لے گی — ’’اکتوبر میں کابل کے آسمان کی روشنی سب نے دیکھی تھی‘‘۔
ان کا کہنا ہے کہ حسب روایت بھارت نے بھی افغان بیانیے کو فوراً اپنا لیا ہے اور سوشل میڈیا پر اس کے ذریعے غلط پروپیگنڈا پھیلانے کی کوشش کر رہا ہے۔
