فیلڈ مارشل عاصم منیر کا دورہ چین، اعلیٰ سیاسی و عسکری قیادت سے ملاقاتیں
فیلڈ مارشل جنرل سید عاصم منیر نے چین کے سرکاری دورے کے دوران اعلیٰ چینی سیاسی و عسکری قیادت سے اہم ملاقاتیں کیں، جن میں دوطرفہ تعلقات، دفاعی تعاون اور علاقائی استحکام کے امور پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل عاصم منیر نے چینی نائب صدر ہان ژینگ، وزیر خارجہ وانگ ژی، اور دیگر اعلیٰ عہدیداران سے علیحدہ علیحدہ ملاقاتیں کیں۔ ان نشستوں میں بدلتے عالمی اور علاقائی منظرنامے، سی پیک کے تحت جاری منصوبے، اور مشترکہ چیلنجز سے نمٹنے کی حکمت عملی زیرِ غور آئی۔
فریقین نے دونوں ممالک کے مابین آہنی اسٹریٹیجک شراکت داری پر مکمل اطمینان کا اظہار کرتے ہوئے خودمختاری، علاقائی سلامتی اور کثیرالجہتی تعاون کے فروغ کے عزم کو دہرایا۔ چینی قیادت نے جنوبی ایشیا میں پاکستان کے تعمیری کردار اور پاک فوج کی پیشہ ورانہ صلاحیتوں کو سراہا۔
دورے کے دوران فیلڈ مارشل نے چینی سنٹرل ملٹری کمیشن کے وائس چیئرمین جنرل ژانگ یوشیا، پی ایل اے آرمی کے سیاسی کمشنر جنرل چن ہوئی اور چیف آف اسٹاف لیفٹیننٹ جنرل کائی زائی جن سے بھی اہم ملاقاتیں کیں۔ پی ایل اے ہیڈکوارٹرز آمد پر فیلڈ مارشل کو گارڈ آف آنر پیش کیا گیا۔
عسکری قیادت کے ساتھ بات چیت میں انسداد دہشتگردی، دفاعی مشقوں، ٹیکنالوجی میں جدت، اور ادارہ جاتی روابط کو وسعت دینے پر زور دیا گیا۔ ہائبرڈ خطرات اور سرحد پار چیلنجز سے نمٹنے کے لیے آپریشنل ہم آہنگی اور مشترکہ حکمت عملی پر بھی اتفاق کیا گیا۔
چینی عسکری قیادت نے پاکستان کے ساتھ دفاعی شراکت داری پر بھرپور اعتماد کا اظہار کرتے ہوئے خطے میں امن کے فروغ میں پاکستان کے کردار کو کلیدی قرار دیا۔ فیلڈ مارشل نے چین کی مستقل حمایت پر اظہارِ تشکر کرتے ہوئے دوطرفہ تعاون کو مزید مستحکم کرنے کے عزم کا اعادہ کیا۔
یہ دورہ پاکستان اور چین کے دیرینہ، گہرے اور بااعتماد سیاسی و عسکری تعلقات کی عکاسی کرتا ہے، جو خطے میں امن و استحکام کے لیے دونوں ممالک کے قریبی اشتراک کی اہمیت کو اجاگر کرتا ہے۔
