پولیو ورکرز کی محنت کی بدولت پاکستان جلد پولیو سے پاک ہوگا،وزیراعظم
وزیراعظم محمد شہباز شریف نے پولیو کے خاتمے میں خدمات انجام دینے والے پولیو ورکرز کی تعریف کی اور کہا کہ ان کی محنت اور حکومتی اقدامات کی بدولت پاکستان سے جلد پولیو کا مکمل خاتمہ ممکن ہوگا۔
اسلام آباد، 24 اکتوبر (اے پی پی) – وزیراعظم جمعہ کو انسداد پولیو کے عالمی دن کے موقع پر منعقدہ تقریب سے خطاب کر رہے تھے۔ اس موقع پر وفاقی وزیر صحت سید مصطفیٰ کمال، وفاقی وزیر اطلاعات و نشریات عطاء اللہ تارڑ، وزیراعظم کی فوکل پرسن برائے انسداد پولیو عائشہ رضا فاروق، مختلف اداروں کے حکام اور ملک بھر سے منتخب پولیو ورکرز بھی موجود تھے۔
وزیراعظم نے انسداد پولیو کے لیے وفاقی وزیر صحت، متعلقہ حکام اور عالمی شراکت داروں کی کاوشوں کو لائق تحسین قرار دیتے ہوئے کہا کہ پاکستان سے پولیو کے مکمل خاتمے کے لیے حکومت پرعزم ہے۔ انہوں نے پولیو ورکرز کی جرات، لگن اور جذبے کو خراج تحسین پیش کرتے ہوئے کہا کہ بعض اوقات وہ اپنی جان خطرے میں ڈال کر مشکل علاقوں میں کام کرتے ہیں۔ ان کی انتھک محنت کی بدولت پاکستان سے جلد پولیو ختم ہوگا۔
وزیراعظم نے کہا کہ وہ اپنی، پوری قوم اور حکومت کی طرف سے پولیو ورکرز کے شکر گزار ہیں اور یوم انسداد پولیو کی تقریب حکومتی عزم کی واضح علامت ہے۔ انہوں نے ان عظیم پاکستانیوں کا ذکر کیا جنہوں نے اپنی زندگی ملک کی خدمت کے لیے وقف کی۔
مزید برآں، وزیراعظم نے ڈبلیو ایچ او، یونیسف، بل گیٹس فاؤنڈیشن اور سعودی عرب سمیت تمام بین الاقوامی شراکت داروں کا خاص طور پر شکریہ ادا کیا جو پاکستان سے پولیو کے خاتمے کے لیے مالی اور تکنیکی معاونت فراہم کر رہے ہیں۔
تقریب کے اختتام پر وزیراعظم نے ملک کے تمام صوبوں اور علاقوں سے تعلق رکھنے والے نمایاں پولیو ورکرز میں شیلڈز تقسیم کیں۔
