اسلام آباد میں مبینہ پولیس مقابلہ: ایک ملزم ہلاک، دو زخمی
اسلام آباد پولیس نے بین الصوبائی خطرناک ڈکیت گینگ کے خلاف کارروائی کی، جس کے دوران ایک ملزم ہلاک اور دو زخمی ہو گئے۔
اسلام آباد پولیس کے ترجمان کے مطابق یہ گینگ پنجاب اور اسلام آباد میں 70 سے زائد سنگین وارداتوں میں مطلوب تھا اور مختلف اضلاع میں خوف و ہراس پھیلا رہا تھا۔
واقعہ تھانہ سنبل کے قریب پیش آیا، جب پولیس گرفتار شدہ ملزمان رحمان علی، عظمت علی اور عادل حسین کے نشاندہی کردہ راستوں پر ان کے ساتھیوں کو گرفتار کرنے اور مال مسروقہ برآمد کرنے گئی۔ اس دوران ملزمان نے اچانک پولیس ٹیم پر فائرنگ شروع کر دی۔
پولیس افسران حفاظتی جیکٹس اور حفاظتی اقدامات کے باعث محفوظ رہے، تاہم گرفتار ملزمان تینوں زخمی ہوئے۔ زخمیوں کو فوری طبی امداد کے لیے ہسپتال منتقل کیا گیا، جہاں رحمان علی زخموں کی تاب نہ لاتے ہوئے دم توڑ گیا۔
پولیس نے ملزمان سے تھانہ بھیکی شیخوپورہ، تھانہ سنبل اور تھانہ گولڑہ اسلام آباد سے چھینی گئی تین موٹر سائیکلیں اور وارداتوں میں استعمال ہونے والا اسلحہ اور گولہ بارود بھی برآمد کرنے کا دعویٰ کیا۔ علاقے میں باقی ملزمان کی تلاش کے لیے سرچ آپریشن جاری ہے۔
