وفاقی کابینہ نے ٹی ایل پی پر پابندی کی منظوری دے دی
اسلام آباد میں وزیراعظم کی زیر صدارت ہونے والے وفاقی کابینہ کے اجلاس میں تحریک لبیک پاکستان (ٹی ایل پی) پر پابندی عائد کرنے کی باضابطہ منظوری دے دی گئی۔
ذرائع کے مطابق اجلاس کے دوران پنجاب حکومت کی جانب سے دی گئی پابندی کی سفارش کابینہ کے سامنے پیش کی گئی، جسے آئین کے آرٹیکل 17 کے تحت منظور کرلیا گیا۔ کابینہ کی منظوری کے بعد وزارتِ داخلہ کو مزید قانونی اور انتظامی کارروائی کے احکامات جاری کردیے گئے ہیں۔
اجلاس میں وزارتِ داخلہ نے ٹی ایل پی سے متعلق تفصیلی بریفنگ دی، جب کہ شرکاء کو پابندی کے اسباب اور معاہدے کے نکات پر عمل درآمد سے متعلق آگاہ کیا گیا۔
وزیراعظم کی صدارت میں ہونے والے اس اجلاس میں ملکی سیاسی و معاشی صورتِ حال پر بھی غور کیا گیا۔ علاوہ ازیں، افغانستان کے ساتھ حالیہ سیز فائر معاہدے کے بعد کی صورتحال پر وزیر دفاع نے کابینہ کو تفصیلی بریفنگ دی۔
اجلاس کے دوران اقتصادی رابطہ کمیٹی (ای سی سی) اور کابینہ کمیٹی برائے قانون سازی کے حالیہ فیصلوں کی بھی توثیق کی گئی۔
ذرائع کے مطابق حکومت نے معاہدے کے اہم نکات پر مکمل عمل درآمد کرلیا ہے، جبکہ وفاقی وزیر علی محمد خان نے کہا کہ حکومت ٹی ایل پی کے تعاون کی بھی شکر گزار ہے۔
