اسلام آباد: وزیرِ اعظم محمد شہباز شریف کی صدارت میں ملکی صنعتی ترقی پر نجی شعبے کی قائم کردہ کمیٹی کا پہلا جائزہ اجلاس آج اسلام آباد میں منعقد ہوا۔ اجلاس میں وفاقی وزراء احسن اقبال، جام کمال خان، احد خان چیمہ، علی پرویز ملک، وزیرِ اعظم کے مشیر محمد علی، وزیرِ مملکت بلال اظہر کیانی، معاون خصوصی ہارون اختر اور ثاقب شیرازی کے ساتھ صنعتی ورکنگ گروپ میں شامل صنعتکار بھی شریک ہوئے۔
اجلاس میں ملکی صنعتی ترقی، کاروبار میں آسانی، سرمایہ کاری میں اضافہ اور روزگار کے مواقع بڑھانے کے حوالے سے نجی شعبے کی جانب سے سفارشات پیش کی گئیں۔ صنعتکاروں کی جانب سے تیار کی گئی تجاویز کی وزیرِ اعظم نے تعریف کی اور انہیں قومی پالیسی فریم ورک میں شامل کرنے کی ہدایت دی۔
وزیرِ اعظم نے کہا کہ ملکی معاشی ترقی، روزگار کی فراہمی اور آمدن میں اضافہ صنعتی ترقی کے بغیر ممکن نہیں۔ انہوں نے کہا کہ کاروبار میں آسانی اور سرمایہ کاری میں اضافے کے اقدامات حکومت کی اولین ترجیح ہیں اور نجی شعبے کی تجاویز کلیدی اہمیت رکھتی ہیں۔
انہوں نے کہا کہ پاکستانی کاروباری برادری نے مشکل وقت میں حکومتی پالیسیوں کا ساتھ دیا اور ملک کو معاشی بحرانوں سے نکالنے میں معاونت کی۔ وزیرِ اعظم نے مزید کہا کہ ان تجاویز کا بغور جائزہ لے کر عملدرآمد کا لائحہ عمل تیار کیا جائے گا اور ملک کی معاشی سمت بہتر ہورہی ہے، مگر ترقی کے لیے مزید محنت کی ضرورت ہے۔
