اسلام آباد اور دیگر علاقوں میں طوفانی بارشیں، مچھ میں گیس پائپ لائن متاثر
اسلام آباد اور دیگر علاقوں میں طوفانی بارشیں، مچھ میں گیس پائپ لائن متاثر
اسلام آباد میں بادل پھٹنے کے بعد سید پور سمیت مختلف علاقوں میں شدید بارش کے باعث سیلابی صورتحال پیدا ہوگئی۔ بھارہ کہو میں گزشتہ تین گھنٹوں سے طوفانی بارش کا سلسلہ جاری ہے جبکہ کہوٹہ اور نتھیا گلی میں بھی وقفے وقفے سے بارش ہو رہی ہے، جس سے موسم خوشگوار ہوگیا ہے۔
ایبٹ آباد میں بھی بارش کا آغاز ہو چکا ہے۔ دوسری جانب بلوچستان کے علاقے مچھ میں سیلابی ریلے کے باعث 4 انچ قطر کی گیس پائپ لائن شدید متاثر ہوئی ہے، جس کے نتیجے میں گیس کی فراہمی معطل ہوگئی ہے۔
اسلام آباد: موسلا دھار بارش، سید پور میں پانی کا بہاؤ تیز، تجاوزات کے خلاف کارروائی کا اعلان
وفاقی دارالحکومت اسلام آباد میں موسلا دھار بارش کے باعث سید پور میں پانی کے بہاؤ میں تیزی آگئی۔ ترجمان کے مطابق غیر قانونی تعمیرات کی وجہ سے بارش کا پانی نشیبی علاقوں میں جمع ہوگیا جبکہ پانی کے شدید بہاؤ کے باعث ایک گاڑی نالے میں گر گئی۔
ترجمان نے کہا کہ بارش رکنے کے بعد سید پور میں قائم تمام غیر قانونی تعمیرات کو منہدم کرنے کے لیے آپریشن شروع کیا جائے گا۔ سینیٹیشن ٹیمیں نکاسی آب کے عمل میں مصروف ہیں تاکہ پانی کے بہاؤ کو معمول پر لایا جا سکے۔
انہوں نے مزید کہا کہ تجاوزات کے مکمل خاتمے تک آپریشن جاری رکھا جائے گا تاکہ آئندہ ایسی صورتحال سے بچا جا سکے۔
