وزیراعظم شہباز شریف نے کہا ہے کہ مئی 2025 میں پاکستان اور بھارت کے درمیان ہونے والی 4 دنہ جنگ میں افواج پاکستان نے بھارت کو سخت جواب دیا، جس پر امریکی کانگریس نے بھی پاکستان کی فتح پر مہر ثبت کی۔ جنگ کے دوران فیلڈ مارشل نے بلا خوف میری مشاورت سے اہم فیصلے کیے۔
وزیراعظم نے باغ آزادکشمیر میں دانش اسکول کا سنگ بنیاد رکھا، جو 137 کنال پر محیط ہے اور تقریباً 800 بچوں کے لیے تعلیم کی سہولیات فراہم کرے گا۔ اسکول میں لڑکوں اور لڑکیوں کے لیے الگ الگ کیمپسز، کھیلوں کی سہولیات، ہاسٹل، کیفے، لانڈری اور ڈیجیٹل لائبریری شامل ہیں۔
شہباز شریف نے کہا کہ دانش اسکولوں کے ذریعے علامہ اقبالؒ اور قائداعظمؒ کے تعلیمی خواب پورے کیے جا رہے ہیں اور یہ ادارے غریب بچوں کو بہترین تعلیمی سہولیات فراہم کر رہے ہیں۔ انہوں نے امریکی کانگریس اور صدر ڈونلڈ ٹرمپ کے حوالے سے بتایا کہ پاکستان نے بھارتی جدید جنگی جہاز مار گرائے اور 7 بھارتی جہاز مارنے کا ذکر بھی امریکی صدر نے کیا۔
وزیراعظم نے کہا کہ پاکستان کو اللہ تعالیٰ نے عزت سے نوازا ہے اور افواج پاکستان کی دلیری اور فتوحات نے دشمن کو گھٹنوں کے بل گرنے پر مجبور کر دیا۔ الفتح میزائل داغے گئے اور افواج پاکستان کی شجاعت نے عالمی سطح پر پاکستان کا وقار بڑھایا۔
