کراچی میں گزشتہ روز ہونے والی موسلا دھار بارش کے بعد شہر کی صورتِ حال اب بھی پریشان کن ہے۔ شہر کے کئی علاقوں میں بجلی کی فراہمی معطل ہے اور متعدد سڑکیں پانی کے سبب بند ہیں۔
گلستان جوہر بلاک 7، 13 اور 18، محمودآباد، اختر کالونی، منظور کالونی، ڈیفنس ویو اور ملیر عالمگیر سوسائٹی میں بجلی ابھی تک بحال نہیں ہو سکی۔
بارش کے پانی کی نکاسی بھی مکمل نہیں ہو سکی۔ ٹاور، آئی آئی چندریگر روڈ، شارعِ فیصل (ایف ٹی سی اور پی اے ایف میوزیم کے قریب) اور یونیورسٹی روڈ (صفورا کے مقام) پر شدید پانی جمع ہے۔ ریڈ زون، شاہین کمپلیکس سے آرٹس کونسل اور ضیاء الدین احمد روڈ تک پانی نکالنے کا کام جاری ہے، جس کے باعث ڈاکٹر ضیاء الدین احمد روڈ کا ایک ٹریک ٹریفک کے لیے بند ہے۔ ڈرگ روڈ اور ناظم آباد انڈر پاس بھی تاحال بند ہیں۔
گورنر ہاؤس سے ایوان صدر روڈ، کھارادر اور ایم اے جناح روڈ (بولٹن مارکیٹ کے اطراف)، جامعہ سندھ اور مدرسۃ الاسلام میں بھی پانی جمع ہے۔ عیسیٰ نگری میں گھٹنوں تک پانی کھڑا ہے اور خراب شدہ گاڑیاں سڑک کنارے رکی ہوئی ہیں۔
اسی دوران رنچھوڑ لائن میں پرانی خالی عمارت کا ایک حصہ گرنے سے ایک مرد اور خاتون زخمی ہوئے، جنہیں سول اسپتال منتقل کیا گیا۔
