کوئٹہ انٹرنیشنل ایئرپورٹ رن وے منصوبہ عالمی سطح پر انجینئرنگ کی مثال قائم

کوئٹہ ایئرپورٹ رن وے منصوبہ عالمی ایوارڈ کا حقدار قرار – بغیر کلیم مکمل ہونے والا منصوبہ

کوئٹہ ایئرپورٹ کے رن وے کی تعمیر نو کا منصوبہ کامیابی سے مکمل کر لیا گیا، جو کہ بغیر کسی کلیم، بغیر کسی حفاظتی واقعے اور بغیر رن وے کی بندش کے مکمل ہونے والا ایک غیرمعمولی پروجیکٹ ہے۔

اس منصوبے نے FIDIC ایشیا پیسیفک انجینئرنگ ایکسیلنس ایوارڈ 2025 اپنے نام کر لیا، جو کہ اسلام آباد میں منعقدہ بین الاقوامی FIDIC کانفرنس کے دوران پاکستان ائیرپورٹس اتھارٹی اور منصوبے کے کنسلٹنٹس کو مشترکہ طور پر دیا گیا۔

یہ ایوارڈ ان کی بہترین منصوبہ بندی، تکنیکی مہارت، اور کامیاب و محفوظ تکمیل کا عالمی سطح پر اعتراف ہے۔ منصوبہ مرحلہ وار طریقے سے ایک مصروف مشترکہ فضائی اڈے پر مکمل کیا گیا، جس سے پاکستان کا طویل ترین اور مضبوط ترین بے لچک (Rigid) رن وے وجود میں آیا۔

رن وے کی تعمیر پر تقریباً 5 ارب روپے کی لاگت آئی، اور 31 مئی 2023 کو اسلام آباد سے آنے والی پرواز PK-3250 نے اس پر پہلی کامیاب لینڈنگ کی۔

منصوبے کی بین الاقوامی اہمیت کو سراہتے ہوئے، مس پلومینو ایلوِیرا (FIDIC کی بین الاقوامی ثالث) نے اسے جنوبی افریقہ اور فرانس میں FIDIC کانفرنسز میں بطور بین الاقوامی کیس اسٹڈی پیش کرنے کی دعوت دی ہے۔

یہ اعزاز پاکستان کی انجینئرنگ، منصوبہ بندی اور ہوا بازی کے شعبوں میں عالمی سطح پر بڑھتی ہوئی ساکھ کا ثبوت ہے، اور پاکستان ائیرپورٹس اتھارٹی کے لیے ایک بڑا اعزاز ہے۔