وفاقی وزیر احسن اقبال کا نیشنل پولیس ہسپتال H-12 کا دورہ، منصوبے کی بروقت تکمیل پر زور

وفاقی وزیر احسن اقبال کا نیشنل پولیس ہسپتال H-12 کا دورہ، منصوبے کی بروقت تکمیل پر زور

وفاقی وزیر برائے منصوبہ بندی، ترقی و اصلاحات احسن اقبال نے اسلام آباد کے سیکٹر H-12 میں زیر تعمیر نیشنل پولیس ہسپتال کا دورہ کیا۔ ان کے ہمراہ وزیر مملکت برائے داخلہ طلال چوہدری، آئی جی اسلام آباد اور ڈپٹی کمشنر اسلام آباد بھی موجود تھے۔

دورے کے دوران احسن اقبال نے ہسپتال کی تعمیر میں جاری پیش رفت کو حوصلہ افزا قرار دیتے ہوئے کہا کہ یہ منصوبہ پولیس اہلکاروں کی فلاح و بہبود اور صحت کی نگہداشت کے لیے ایک اہم سنگ میل ہے۔

انہوں نے متعلقہ حکام کو ہدایت کی کہ منصوبے کو جون 2026 تک ہر صورت مکمل کیا جائے تاکہ پولیس فورس کے لیے بروقت جدید طبی سہولیات میسر آ سکیں۔

احسن اقبال نے کہا کہ:

“قانون نافذ کرنے والے اداروں کے حالات میں بہتری لانا حکومت کی اولین ترجیح ہے، اور نیشنل پولیس ہسپتال اس عزم کی عملی تعبیر ہے۔”

ہسپتال سو بستروں پر مشتمل ہوگا اور یہاں جنرل میڈیسن، سرجری، ایمرجنسی اور ہنگامی صورتحال میں علاج معالجے کی سہولیات دستیاب ہوں گی۔

منصوبے سے اسلام آباد پولیس کے تقریباً 12,000 اہلکاروں کو براہ راست فائدہ پہنچے گا۔

وفاقی وزیر نے یاد دہانی کروائی کہ اس منصوبے کو مئی 2023 میں منظوری دی گئی تھی اور اس کی بروقت تکمیل کو قومی فریضہ قرار دیتے ہوئے کہا:

“ٹیکس دہندگان کے پیسوں سے بننے والے قومی منصوبے ہماری قومی امانت ہیں اور ان کی ذمہ دارانہ تکمیل ہم سب کی مشترکہ ذمہ داری ہے۔”