پشاور (بیورو رپورٹ): خیبرپختونخوا میں حالیہ بارشوں اور اچانک سیلاب کے باعث بڑے پیمانے پر جانی و مالی نقصانات ہوئے ہیں۔ صوبائی ڈیزاسٹر مینجمنٹ اتھارٹی (پی ڈی ایم اے) کی رپورٹ کے مطابق مختلف حادثات میں اب تک 358 افراد جاں بحق اور 181 زخمی ہو چکے ہیں۔
رپورٹ کے مطابق جاں بحق ہونے والوں میں 287 مرد، 41 خواتین اور 30 بچے شامل ہیں جبکہ زخمیوں میں 144 مرد، 27 خواتین اور 10 بچے شامل ہیں۔
بارشوں اور سیلاب سے مجموعی طور پر 780 مکانات متاثر ہوئے، جن میں 431 جزوی طور پر اور 349 مکمل طور پر تباہ ہو گئے۔
پی ڈی ایم اے کے مطابق ضلع بونیر سب سے زیادہ متاثر ہوا، جہاں اب تک 225 افراد جاں بحق ہوئے ہیں۔ دیگر متاثرہ اضلاع میں سوات، باجوڑ، مانسہرہ، شانگلہ، دیر لوئر، بٹگرام اور صوابی شامل ہیں۔
محکمہ موسمیات نے پیش گوئی کی ہے کہ 17 سے 19 اگست کے دوران مزید شدید بارشیں ہو سکتی ہیں جبکہ موجودہ سلسلہ 21 اگست تک وقفے وقفے سے جاری رہنے کا امکان ہے۔
پی ڈی ایم اے نے متاثرہ اضلاع کی انتظامیہ کو امدادی سرگرمیاں تیز کرنے اور متاثرین کو فوری ریلیف فراہم کرنے کی ہدایت کی ہے۔ ترجمان کے مطابق ایمرجنسی آپریشن سینٹر مکمل طور پر فعال ہے اور عوام کسی بھی ہنگامی صورتحال یا معلومات کے لیے ہیلپ لائن 1700 پر رابطہ کر سکتے ہیں۔
