پاکستان کے مختلف صوبوں میں شدید بارشوں اور سیلابی صورتحال کا خطرہ بڑھ گیا ہے۔ شمالی خیبر پختونخواہ کے اضلاع چترال، دیر، سوات، کلام، مانسہرہ، بٹگرام، ایبٹ آباد اور ہری پور میں موسلادھار بارش کے باعث لینڈ سلائیڈنگ اور اچانک سیلاب کا امکان ہے۔
وسطی خیبر پختونخواہ کے مردان، صوابی، پشاور، چارسدہ، نوشہرہ، کوہاٹ اور ہنگو کے شہری علاقوں میں شدید سیلابی صورتحال متوقع ہے جبکہ جنوبی خیبر پختونخواہ کے بنوں، لکی مروت، ڈی آئی خان، وزیرستان، کرم اور باجوڑ کے نشیبی علاقوں میں طغیانی کا خدشہ ہے۔
اسلام آباد اور شمالی پنجاب کے راولپنڈی، اٹک، جہلم، چکوال، تلہ گنگ میں شدید بارش کے باعث شہری اور نشیبی علاقوں میں سیلابی صورتحال کا امکان ہے۔ وسطی پنجاب میں میانوالی، خوشاب، سرگودھا، فیصل آباد، منڈی بہاؤالدین اور گجرات میں شدید بارش اور ندی نالوں میں طغیانی کی پیشگوئی کی گئی ہے۔
شمال مشرقی پنجاب کے گوجرانوالہ، سیالکوٹ، حافظ آباد اور نارووال میں موسلادھار بارش، لاہور، قصور اور اوکاڑہ میں شدید بارش کے باعث شہری علاقوں میں سیلاب کا خطرہ ہے۔ دریاۓ جہلم، راوی اور ستلج میں بھی طغیانی کا خدشہ ہے۔
بلوچستان کے شمالی اضلاع کوئٹہ، ژوب، زیارت، لورالائی، قلات، نوشکی، برکھان، سبی، ڈیرہ بگٹی، سوئی اور خاران میں وقفے وقفے سے بارش متوقع ہے جبکہ جنوبی بلوچستان کے خضدار، آواران، واشک، تربت، ہنگول، اور ماڑہ، گڈانی میں شدید بارش اور پہاڑی ندی نالوں میں اچانک سیلابی صورتحال کا خدشہ ہے۔
