بلوچستان کے ضلع جھل مگسی میں تیل و گیس کا اہم منصوبہ کامیابی سے آپریشنل ہو گیا ہے۔ او جی ڈی سی ایل نے جھل مگسی ڈویلپمنٹ پراجیکٹ مکمل کر کے اسٹاک ایکسچینج کو افتتاح کی اطلاع دی۔
ترجمان او جی ڈی سی ایل کے مطابق منصوبہ وزیراعظم شہباز شریف کی ہدایات پر فاسٹ ٹریک بنیادوں پر مکمل ہوا۔ اس منصوبے سے روزانہ 14 ملین معکب فٹ گیس اور 45 بیرل تیل کی پیداوار حاصل ہو رہی ہے، جبکہ حاصل شدہ گیس کو ایس ایس جی سی ایل کی مین پائپ لائن میں شامل کر دیا گیا ہے۔
جھل مگسی منصوبے میں او جی ڈی سی ایل بطور آپریٹر 56 فیصد، پی او ایل 24 فیصد اور جی ایچ پی ایل 20 فیصد کی شراکت دار ہیں۔ منصوبہ فروری 2024 میں حکومت کے مراعاتی پیکج کی منظوری کے بعد شروع ہوا تھا۔
ترجمان نے بتایا کہ او جی ڈی سی ایل نے سی ایس آر اقدامات کے تحت جھل مگسی میں اسکول، ہیلتھ کیئر سینٹرز اور کم آمدنی والے بے گھر افراد کے لیے 84 ماڈل مکانات تعمیر کیے۔ مقامی نوجوانوں کے لیے اسکالرشپس اور نیووٹیک کے ذریعے فنی تربیت کے مواقع فراہم کیے گئے۔ صحت کی سہولتوں کے لیے ایمبولینسز، فری کیمپس اور 800 خاندانوں کو راشن بیگز فراہم کیے گئے، جبکہ صاف پانی کی فراہمی کے لیے 2 آر او پلانٹس اور متعدد واٹر ٹینکس نصب کیے گئے۔
