آئی جی اسلام آباد، سید علی ناصر رضوی نے تمام تھانہ جات کے ایس ایچ اوز کے ساتھ ایک اہم اجلاس میں ہدایات جاری کیں۔ انہوں نے کہا کہ عوامی مسائل کا حل اولین ترجیح ہے اور فرائض کی انجام دہی میں کسی قسم کی کوتاہی برداشت نہیں کی جائے گی۔
آئی جی نے ہدایت کی کہ تمام ایس ایچ اوز عوامی خدمت کو اپنا شعار بنائیں، رات گئے تک اپنے علاقوں میں پٹرولنگ کریں اور نفری کو منظم انداز میں سیکیورٹی، تفتیش اور پٹرولنگ کے لیے استعمال کریں۔ پولیس کی موجودگی ہر تھانہ کی حدود میں واضح نظر آنی چاہیے۔
انہوں نے تمام افسران کو ہدایت دی کہ پولیس اسٹیشن کے انتظامی امور پیشہ وارانہ انداز میں انجام دیں اور ہنگامی صورتحال میں فوری اور مؤثر ریسپانس یقینی بنائیں۔
قبضہ مافیا، منشیات فروش، ہوائی فائرنگ اور اسلحہ کی نمائش کے خلاف سخت قانونی کارروائی کی جائے اور اشتہاری مجرمان سمیت عدالتی مفروران کی گرفتاری کو یقینی بنایا جائے۔ کرائم کی روک تھام کے لیے موثر حکمت عملی اپنائی جائے اور تمام افسران مکمل ہم آہنگی کے ساتھ اپنے فرائض سر انجام دیں۔
آئی جی نے زور دیا کہ شہریوں کی جان و مال کا تحفظ اور امن و امان برقرار رکھنا اولین ترجیح ہے۔
