وزیراعظم محمد شہباز شریف کی زیر صدارت بجلی کے شعبے میں اصلاحات کے حوالے سے جائزہ اجلاس منعقد ہوا، جس میں وزیراعظم کو پاور سیکٹر کے روڈمیپ پر پیشرفت اور اصلاحات کی تفصیلی بریفنگ دی گئی۔
اجلاس میں وزیراعظم نے بجلی کی ترسیل کار کمپنیوں (DISCOs) اور پیداواری کمپنیوں (GENCOs) کی نجکاری کے عمل کو تیز کرنے کی ہدایت کی۔ وزیراعظم کا کہنا تھا کہ بجلی کے نظام کی نجکاری کے ذریعے ملک میں مسابقت پر مبنی بجلی کی مارکیٹ کی تشکیل ہی توانائی کے مسائل کا پائیدار حل ہے۔
انہوں نے بجلی کی ترسیل کے نظام کو مزید بہتر بنانے کے لیے متعلقہ ترقیاتی منصوبوں کو ترجیحی بنیادوں پر مکمل کرنے، اور بیٹری اینرجی سٹوریج سسٹم پر پبلک پرائیویٹ پارٹنرشپ اور نجی شعبے کی شمولیت سے کام شروع کرنے کی ہدایت کی۔
اجلاس میں تین ترسیل کار کمپنیوں IESCO، FESCO اور GEPCO کی نجکاری کے حوالے سے اقدامات جاری ہونے اور جلد ایکسپریشن آف انٹرسٹ (EoIs) شائع کیے جانے کی بریفنگ دی گئی۔ بجلی کی ترسیل کے نظام کی بہتری کے لیے 500 کے وی کے غازی بروتھا – فیصل آباد ٹرانسمیشن لائن کے پی سی ون کی منظوری کے مراحل میں ہونے، اور درآمدی کوئلے پر چلنے والے پلانٹس کو تھر کول پر منتقل کرنے کے لیے ٹیکنیکل فیزیبیلیٹی مکمل ہونے کی تفصیلات بھی دی گئیں۔ تھر کول پلانٹس تک ریلوے لائن پر کام جاری ہے۔
اجلاس میں پاور سیکٹر میں مسابقت پر مبنی بجلی کی مارکیٹ کی آپریشنلائزیشن، لائن لاسز میں کمی، اور بیٹری اینرجی سٹوریج سسٹم کے کنسیپٹ کلیئرنس پروپوزل کی منظوری اور فیزیبیلیٹی سٹڈی کے مراحل پر بھی بریفنگ دی گئی۔
اجلاس میں وفاقی وزراء محمد اورنگزیب، احد خان چیمہ، سردار اویس احمد لغاری، مشیر برائے نجکاری محمد علی، وزیر مملکت برائے خزانہ بلال اظہر کیانی، اور متعلقہ اداروں کے اعلیٰ افسران شریک تھے۔
