اسلام آباد – قومی اسمبلی اور سینیٹ سے 27ویں آئینی ترمیم کی منظوری کے بعد جسٹس امین الدین خان نے پہلے وفاقی آئینی عدالت کے سربراہ کے طور پر حلف اٹھایا۔
چیف جسٹس امین الدین خان نے ایوان صدر میں صدر مملکت آصف علی زرداری سے حلف لیا۔ تقریب میں وزیراعظم شہباز شریف، فیلڈ مارشل عاصم منیر، چیئرمین جوائنٹ چیف آف اسٹاف کمیٹی ساحر شمشاد، چیف جسٹس پاکستان یحییٰ آفریدی، وفاقی وزیر قانون اعظم نذیر تارڑ، اٹارنی جنرل منصور عثمان اعوان اور دیگر عدالتی و سرکاری شخصیات موجود تھیں۔
ذرائع کے مطابق چیف جسٹس امین الدین خان اسلام آباد ہائی کورٹ روم نمبر ایک میں فائز ہوں گے جبکہ اسلام آباد ہائی کورٹ کے چیف جسٹس سرفراز ڈوگر روم نمبر 2 میں منتقل ہو جائیں گے۔
اسی تقریب کے دوران وفاقی آئینی عدالت کے تین ججز – جسٹس حسن اظہر رضوی، جسٹس عامر فاروق اور جسٹس علی باقر نجفی – نے بھی حلف اٹھایا۔ اسلام آباد ہائی کورٹ کے دیگر ججز اور عدالتی افسران بھی تقریب میں شریک ہوئے، جبکہ کچھ ججز شریک نہیں ہو سکے۔
