معرکہ حق میں شاندار کامیابی: سول و عسکری شخصیات کو اعلیٰ اعزازات سے نوازا گیا
بھارت کے خلاف معرکہ حق میں شاندار فتح کے بعد ایوان صدر میں ایک پروقار تقریب کا انعقاد کیا گیا، جس میں صدر مملکت آصف علی زرداری نے سول اور عسکری شخصیات کو اعلیٰ اعزازات سے نوازا۔
فیلڈ مارشل عاصم منیر اور ایئر چیف مارشل ظہیر احمد بابر سدھو کو ہلال امتیاز دیا گیا جبکہ وفاقی وزرا، چیئرمین پاکستان پیپلز پارٹی بلاول بھٹو اور دیگر نمایاں شخصیات کو نشان امتیاز سے نوازا گیا۔
صدر مملکت کی جانب سے وزیر خارجہ اسحاق ڈار، وزیر قانون اعظم نذیر تارڑ، وزیر دفاع خواجہ آصف، وزیر اعظم کے مشیر رانا ثنا اللہ، اور پارلیمانی کمیٹی کے سربراہ بلاول بھٹو کو نشان امتیاز سے نوازا گیا۔ اس کے علاوہ وزیر داخلہ محسن نقوی، احسن اقبال، شیری رحمان، فیصل سبزواری، مصدق ملک اور حنا ربانی کھر کو بھی سول اعزازات سے نوازا گیا۔ طارق فاطمی اور خرم دستگیر خان کو بھی اعلیٰ سول ایوارڈز دیے گئے۔
وفاقی وزیر اطلاعات و نشریات عطاء اللہ تارڑ کو حالیہ پاک بھارت کشیدگی کے دوران قومی بیانیہ عالمی سطح پر موثر انداز میں پیش کرنے پر نشان امتیاز دیا گیا۔ انہوں نے سول و عسکری اداروں کے درمیان مکمل ہم آہنگی قائم کی اور بھارت کے پروپیگنڈے کو ناکام بناتے ہوئے پاکستان کے موقف کو بین الاقوامی فورمز پر اجاگر کیا۔
صدر پاکستان کی جانب سے معرکہ حق میں پاک فوج کی قیادت کرنے اور بہترین جنگی حکمت عملی مرتب کرنے پر فیلڈ مارشل و آرمی چیف عاصم منیر کو ہلال جرات سے نوازا گیا جبکہ ایئر چیف مارشل ظہیر بابر احمد سدھو کو بھی ہلال امتیاز دیا گیا۔
چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور نیول چیف ایڈمرل نوید اشرف کو نشان امتیاز سے نوازا گیا۔ ڈی جی آئی ایس آئی لیفٹیننٹ جنرل عاصم ملک کو ستارہ بسالت عطا کیا گیا، جبکہ ڈی جی ملٹری آپریشنز میجر جنرل کاشف عبداللہ، ایئر وائس مارشل محمد اورنگزیب اور رئیر ایڈمرل شہزاد حامد کو تمغہ بسالت سے نوازا گیا۔
وزیراعظم کے میڈیا کوآرڈینیٹر بدر شہباز کو تمغہ امتیاز سے نوازا گیا، جنہوں نے معرکہ حق میں صحافت کے شعبے میں اہم کردار ادا کیا۔
