آرمی چیف عاصم منیر کا سیلاب متاثرین کے لیے عملی تعاون کا وعدہ
چیف آف آرمی اسٹاف فیلڈ مارشل سید عاصم منیر، نشانِ امتیاز (ملٹری)، ہلالِ جرات نے قصور سیکٹر اور جلالپور پیروالا (ملتان) میں قائم فلڈ ریلیف کیمپس کا دورہ کیا اور جاری ریسکیو و ریلیف سرگرمیوں کا جائزہ لیا۔
اس موقع پر آرمی چیف کو سیلابی صورتحال اور امدادی اقدامات پر تفصیلی بریفنگ دی گئی۔ انہوں نے سول انتظامیہ سے گفتگو میں کہا کہ ہر سال قیمتی جانوں اور املاک کے نقصان کے متحمل نہیں ہو سکتے، اس لیے انفراسٹرکچر کی مضبوطی اور سیلاب سے بچاؤ کے اقدامات کو تیز کرنا ناگزیر ہے۔
سیلاب متاثرین سے ملاقات میں فیلڈ مارشل عاصم منیر نے مکمل تعاون اور بروقت بحالی کی یقین دہانی کرائی جس پر متاثرین نے پاک فوج کی بروقت امداد پر شکریہ ادا کیا۔
آرمی چیف نے ریسکیو آپریشنز میں مصروف پاک فوج کے جوانوں، ریسکیو 1122 اور پولیس اہلکاروں کے جذبے اور انتھک محنت کو سراہتے ہوئے کہا کہ سول اور فوجی اداروں کی مشترکہ کاوشیں عوامی خدمت کی بہترین مثال ہیں۔
بعد ازاں انہوں نے لاہور-قصور اور ملتان-جلالپور پیروالا کے متاثرہ علاقوں کا فضائی معائنہ بھی کیا تاکہ نقصان اور ریلیف سرگرمیوں کا براہِ راست جائزہ لیا جا سکے۔
دورے کے دوران کور کمانڈر لاہور اور کور کمانڈر ملتان کے علاوہ چیف سیکرٹری پنجاب اور سول انتظامیہ کے اعلیٰ افسران بھی موجود تھے۔
