آذربائیجان کی فوج کے پہلے ڈپٹی وزیر دفاع اور چیف آف جنرل اسٹاف، کرنل جنرل کریم ولییف نے آج جنرل ہیڈ کوارٹرز (جی ایچ کیو) میں پاکستان کے چیف آف آرمی اسٹاف، فیلڈ مارشل سید عاصم منیر (این آئی ایم) سے ملاقات کی۔
ملاقات میں باہمی دلچسپی کے امور پر تفصیلی تبادلہ خیال کیا گیا، خاص طور پر موجودہ عالمی اور علاقائی سکیورٹی صورتحال پر۔ آرمی چیف نے آذربائیجان کے ساتھ پاکستان کے گہرے برادرانہ تعلقات پر روشنی ڈالی اور انہیں مزید مضبوط کرنے کے عزم کا اعادہ کیا۔ انہوں نے آذربائیجان اور آرمینیا کے درمیان امن معاہدے کی کامیاب تکمیل پر معزز مہمان کو مبارکباد بھی پیش کی۔
کرنل جنرل کریم ولییف نے پاک فوج کی پیشہ ورانہ مہارت اور “معرکۂ حق” اور “آپریشن بنیان مرصوص” میں کامیابی پر سراہا، جبکہ آذربائیجانی وفد نے پاکستان کے یوم آزادی اور فتح کی تقریبات کے لیے نیک خواہشات کا اظہار کیا۔ آرمی چیف نے آذربائیجان کی قیادت اور عوام کا شکریہ ادا کیا کہ انہوں نے معرکۂ حق کے دوران پاکستان کے ساتھ کھڑے ہو کر یکجہتی کا اظہار کیا اور یوم آزادی کی تقریب میں آذربائیجانی دستے کو بھیج کر شرکت کی۔
ملاقات میں دونوں عسکری قیادتوں نے دفاعی تعاون کو مزید فروغ دینے اور خطے میں امن و استحکام کے لیے مشترکہ کاوشیں جاری رکھنے کے عزم کا اعادہ کیا۔
اس موقع پر کرنل جنرل کریم ولییف نے آذربائیجان کے صدر الہام علییف کی جانب سے فیلڈ مارشل عاصم منیر کو “فوجی تعاون کے میدان میں خدمات” پر آذربائیجان کا اعلیٰ ترین پٹریاٹک وار میڈل عطا کیا۔ انہوں نے دہشت گردی کے خاتمے میں پاکستان کی ثابت قدم کوششوں کو سراہا اور دفاع و سلامتی میں مزید تعاون بڑھانے کے عزم کا اظہار کیا۔
اس سے قبل جی ایچ کیو آمد پر کرنل جنرل کریم ولییف کو پاک فوج کے چاق و چوبند دستے نے گارڈ آف آنر پیش کیا اور انہوں نے یادگارِ شہداء پر پھول چڑھائے
