اسلام آباد: پاکستان کے دفتر خارجہ نے بھارتی وزارت خارجہ کے حالیہ بیان کو غیر سنجیدہ، حقائق مسخ کرنے والا اور بے بنیاد قرار دے کر مسترد کر دیا ہے۔ ترجمان دفتر خارجہ نے کہا کہ بھارتی بیان حقائق کو توڑ مروڑ کر پیش کرنے کی عادت کا ایک اور ثبوت ہے۔ پاکستان طاقت کے استعمال یا اس کی دھمکی کا سخت مخالف ہے، جبکہ بھارت ہر موقع پر جنگی جنون اور الزام تراشی کا سہارا لیتا ہے۔
ترجمان نے واضح کیا کہ پاکستان ایک ذمہ دار ایٹمی ملک ہے، جہاں کمانڈ اینڈ کنٹرول کا مکمل سویلین نظام موجود ہے، اور ملک نے ہمیشہ تحمل اور نظم و ضبط کا مظاہرہ کیا ہے۔ انہوں نے کہا کہ پاکستان کی انسداد دہشت گردی کی کاوشیں دنیا بھر میں تسلیم شدہ ہیں، جبکہ بھارتی الزامات غیر ذمہ دارانہ اور ثبوت سے عاری ہیں۔
انہوں نے مزید کہا کہ بھارت کا تیسرے ممالک کو بلاوجہ شامل کرنے کا رویہ اس کی سفارتی کمزوری کی علامت ہے۔ ترجمان نے دو ٹوک مؤقف اپناتے ہوئے کہا کہ پاکستان بطور ذمہ دار ریاست اپنا کردار جاری رکھے گا، اور اگر بھارت نے کسی بھی قسم کی جارحیت کی تو اس کا فوری اور بھرپور جواب دیا جائے گا۔ کشیدگی کی تمام تر ذمہ داری بھارتی قیادت پر عائد ہوگی۔
