وزیر ریلوے محمد حنیف عباسی نے اعلان کیا ہے کہ دس ستمبر کو کراچی میں جدید ریلوے اسٹیشن کا افتتاح کیا جائیگا۔
وزیر ریلوے نے فیصل آباد ریلوے اسٹیشن کے دورے کے دوران میڈیا سے گفتگو میں بتایا کہ وزیراعظم کے وژن کے تحت پاکستان ریلوے کو جدید بنانے کے لیے ملک بھر میں مختصر اور طویل المدتی منصوبے تیزی سے چل رہے ہیں۔
انہوں نے کہا کہ سندھ حکومت کے تعاون سے روہڑی ریلوے اسٹیشن کو لاہور ماڈل پر اپ گریڈ کیا جائیگا جبکہ کراچی میں جدید اسٹیشن 10 ستمبر کو افتتاح کے لیے تیار ہوگا۔ مزید برآں، سبی تا روہڑی (250 کلومیٹر) اور روہڑی تا کراچی (480 کلومیٹر) سیکشنز کی فزیبلٹی رپورٹ آئندہ دو ماہ میں مکمل ہوگی جس کے بعد جون 2026 تک تعمیر کا آغاز متوقع ہے۔
حنیف عباسی نے ریلوے کی ڈیجیٹلائزیشن پر بھی روشنی ڈالتے ہوئے کہا کہ ٹکٹنگ سسٹم مکمل طور پر آن لائن ہو چکا ہے، ٹرین ٹریکنگ فعال ہے، اور بڑے اسٹیشنز پر اے ٹی ایم مشینیں نصب کی جا چکی ہیں۔مریم نواز کے تعاون سے صوبے کے 40 ریلوے اسٹیشنز پر وائی فائی سروس فراہم کی جا رہی ہے جسکا آغاز لاہور سے ہو چکا ہے اور جلد یہ سہولت کراچی، حیدرآباد، فیصل آباد اور دیگر شہروں تک پہنچائی جائیگی.
وزیر ریلوے نے بتایا کہ ریلوے کی آؤٹ سورسنگ کا عمل 30 ستمبر تک مکمل کیا جائیگا، جس کے تحت مسافر ٹرینیں، فریٹ ٹرینز، مہمان خانے، سلونز، اسپتال، اسکولز اور دیگر سہولیات نجی شعبے کو دی جائیں گی تاکہ معیار اور آمدنی میں بہتری آئے۔
اسکے علاوہ شاہدرہ تا رائیونڈ تک لینیئر پارک کی تعمیر شروع ہو چکی ہے جسکی لاگت دو ارب 35 کروڑ روپے ہے۔ کراچی، لاہور، راولپنڈی اور ٹیکسلا اسٹیشنز کی اپ لفٹ کے علاوہ بلوچستان میں شیخ زید سے کچلاک تک پچاس کلومیٹر سیکشن کی اپ گریڈیشن بھی شامل ہے۔
