مند میں دو مقامات پر پاکستانی فورسز پر مسلح افراد کا حملہ

مشکے اور کولواہ کے مختلف مقامات پر قابض پاکستانی فوج اور ڈیتھ اسکواڈز پر حملوں میں پانچ اہلکار جان بحق اور متعدد زخمی ہوئے۔ بلوچستان لبریشن فرنٹ (بی ایل ایف) کے ترجمان میجر گہرام بلوچ نے میڈیا کو بتایا کہ 6 اور 8 اگست کو مشکے اور کولواہ میں قابض پاکستانی فوج اور ڈیتھ اسکواڈز کو چار مختلف مقامات پر نشانہ بنایا گیا، جس کے نتیجے میں پانچ اہلکار جان بحق اور متعدد زخمی ہوئے۔

ترجمان کے مطابق، 6 اگست کو بی ایل ایف کے سرمچاروں نے مشکے کے علاقے بنڈکی میں فوج کے چیک پوسٹ پر اسنائپر حملہ کیا، جس میں ایک اہلکار جان بحق ہوا، جبکہ فوجی کیمپ کو بھاری ہتھیاروں سے نشانہ بنایا گیا۔

8 اگست کو کولواہ میں تین مختلف مقامات پر قابض فوج اور ڈیتھ اسکواڈز پر حملے کیے گئے۔ پہلے حملے میں گیشکور کے فوجی کیمپ کو دو طرف سے بھاری ہتھیاروں سے نشانہ بنایا گیا، جو تقریباً آدھے گھنٹے تک جاری رہا۔ اس دوران دشمن نے شہری علاقوں پر مارٹر گولے داغے۔ جھڑپ کے بعد سرمچار بحفاظت واپس نکل گئے اور دشمن کو جانی و مالی نقصان اٹھانا پڑا۔

دوسرے حملے میں کولواہ گراڈی کے فوجی کیمپ پر راکٹ فائر کیے گئے، جس میں دشمن کے دو اہلکار جان بحق ہوئے۔ تیسرے حملے میں کولواہ ڈنڈار کے مادگ کلات علاقے میں شدید لڑائی ہوئی، جہاں سرمچاروں نے دشمن کے دو اہلکاروں کو نشانہ بنایا اور اپنے گھیرے میں آئے ساتھیوں کو بحفاظت نکال کر اپنے ٹھکانوں تک پہنچایا۔

بی ایل ایف نے مشکے اور کولواہ میں کیے گئے حملوں کی ذمہ داری قبول کرتے ہوئے کہا ہے کہ آزاد بلوچستان کے حصول تک قابض فوج، اس کی تنصیبات اور پراکسی ڈیتھ اسکواڈ کو نشانہ بناتی رہے گی۔