اسلام آباد: فیڈرل بورڈ آف ریونیو (ایف بی آر) نے کاروباری برادری کیلئے سخت قوانین تیار کر لیے ہیں، جن کے تحت سیلز ٹیکس رجسٹرڈ افراد کیلئے ایف بی آر کے کمپیوٹرائزڈ سسٹم سے منسلک ہونا لازمی ہوگا۔
دستاویز کے مطابق بزنس پوائنٹس پر سی سی ٹی وی کیمروں کی تنصیب، ڈیبٹ و کریڈٹ کارڈ مشینیں، کیو آر کوڈ اور دیگر ڈیجیٹل ادائیگی کے ذرائع کو ایف بی آر سسٹم سے جوڑنا ضروری قرار دیا گیا ہے۔ آن لائن فروخت کرنے والے کاروباری افراد کو اپنی ویب سائٹ، سافٹ ویئر اور موبائل ایپلی کیشن بھی ایف بی آر سے لنک کرنا ہوں گی۔
قواعد کے مطابق “انٹیگریٹڈ شخص” ٹیکس افسر کو کاروباری احاطے اور ریکارڈ تک رسائی دینے کا پابند ہوگا، جبکہ الیکٹرانک سسٹم سے چھیڑ چھاڑ پر جرمانے اور پابندیاں عائد کی جائیں گی۔ انٹرنیٹ یا بجلی کی بندش کی صورت میں بھی انوائسز 24 گھنٹے کے اندر اپ لوڈ کرنا لازمی ہوگا۔
ایف بی آر نے ٹیکس چوری کی روک تھام کیلئے ایک انفورسمینٹ نیٹ ورک قائم کرنے کا فیصلہ کیا ہے، اور کیو آر کوڈ یا ایف بی آر نمبر کے بغیر جاری انوائسز پر قانونی کارروائی ہوگی۔ سیلز ٹیکس انوائس میں ڈیجیٹل دستخط، کیو آر کوڈ اور ایف بی آر کا منفرد نمبر شامل کرنا ضروری ہوگا۔
مزید یہ کہ کاروباری افراد کو یومیہ، ہفتہ وار اور ماہانہ بنیاد پر الیکٹرانک انوائسز کا ریکارڈ مرتب کرنا ہوگا اور یہ ڈیٹا کم از کم 6 سال تک محفوظ رکھنا لازمی ہوگا۔
