جاپان کے شمال مشرقی علاقوں میں شدت 7.6 کا زلزلہ ریکارڈ کیا گیا، جس کے بعد حکام نے فوری طور پر سونامی وارننگ جاری کی اور مقامی شہریوں کو محفوظ مقامات پر منتقل ہونے کی ہدایت کی۔
برطانوی خبر رساں ادارے رائٹرز کے مطابق، جاپان موسمیاتی ایجنسی نے بتایا کہ زلزلہ رات 11 بج کر 15 منٹ پر سمندر میں آیا۔ شمال مشرقی ساحل پر 3 میٹر (10 فٹ) تک بلند سونامی کے خطرے کا اظہار کیا گیا، اور شہریوں کو احتیاطی تدابیر اختیار کرنے کی ہدایت دی گئی۔
ہوکائیڈو، آوموری اور ایواتے صوبوں کے لیے سونامی وارننگ جاری کی گئی، جبکہ آدھی رات سے قبل آوموری کے متسو اوگاوارا اور ہوکائیڈو کے یوراکاوا پورٹس پر 40 سینٹی میٹر بلند لہریں ریکارڈ کی گئیں۔ زلزلے کا مرکز آوموری کے ساحل سے 80 کلومیٹر دور اور 50 کلومیٹر گہرائی میں تھا۔
ابتدائی اطلاعات کے مطابق کسی جانی نقصان یا تباہی کی رپورٹ موصول نہیں ہوئی، مگر حکام صورتحال پر مسلسل نظر رکھے ہوئے ہیں۔ زلزلے کے بعد شہریوں کے انخلا کے احکامات جاری کیے گئے، اور مشرقی جاپان ریلوے نے بعض ٹرین سروسز معطل کر دی ہیں۔
یہی خطہ مارچ 2011 میں 9.0 شدت کے تباہ کن زلزلے اور سونامی سے شدید متاثر ہوا تھا۔ جاپان دنیا کے سب سے زیادہ زلزلہ خیز ممالک میں شامل ہے، جہاں اوسطاً ہر 5 منٹ بعد جھٹکا محسوس کیا جاتا ہے۔ بحرالکاہل کے گرد “رِنگ آف فائر” کے علاقے کی وجہ سے دنیا میں آنے والے 6.0 یا اس سے زائد شدت کے تقریباً 20 فیصد زلزلے جاپان میں ریکارڈ کیے جاتے ہیں۔
