سیلاب متاثرین کے لیے بڑا اعلان
لاہور: وزیر اعلیٰ پنجاب مریم نواز شریف کی ہدایت پر سیلاب متاثرین کے لیے بڑے پیمانے پر ریلیف آپریشن کا آغاز کر دیا گیا ہے۔
ریلیف کمشنر پنجاب نبیل جاوید کی زیر صدارت پی ڈی ایم اے ہیڈ آفس لاہور میں اہم اجلاس ہوا، جس میں مختلف محکموں کے نمائندوں نے شرکت کی اور نقصانات کے تخمینے اور متاثرین کے لیے امدادی فریم ورک کا تفصیلی جائزہ لیا۔
نبیل جاوید نے بتایا کہ 12 ستمبر سے متاثرہ علاقوں میں جامع سروے شروع ہوگا، جس میں پاک فوج، اربن یونٹ، ریونیو، زراعت اور لائیو اسٹاک کے ماہرین شامل ہوں گے۔ اس سروے میں جاں بحق افراد، تباہ شدہ گھروں، فصلوں اور مویشیوں کے نقصانات کا مکمل ریکارڈ اکٹھا کیا جائے گا۔
اب تک کے اعداد و شمار کے مطابق صوبے کے 4 ہزار 155 موضع جات میں 41 لاکھ 51 ہزار افراد متاثر ہوئے ہیں۔ جاں بحق افراد کے لواحقین کو فی کس 10 لاکھ روپے معاوضہ دیا جائے گا، جبکہ متاثرہ گھروں، فصلوں اور مویشیوں کے مالکان کو بھی مالی امداد فراہم کی جائے گی۔
اجلاس میں فیصلہ کیا گیا کہ امدادی پیکج کی حتمی منظوری وزیر اعلیٰ پنجاب مریم نواز شریف خود دیں گی تاکہ متاثرین کو شفاف اور بروقت ریلیف مل سکے۔
