چینی ٹیکنالوجی نے کمال دکھایا، مغربی ہتھیار لینے کو بھی تیار ہیں،ڈی جی آئی ایس پی آر
اسلام آباد : پاکستان نے چین سے حاصل کیے گئے جدید ہتھیاروں کی تعریف کرتے ہوئے کہا ہے کہ مئی میں بھارت کے ساتھ ہونے والی چار روزہ جھڑپ کے دوران چینی ٹیکنالوجی نے غیر معمولی کارکردگی دکھائی۔
بین الاقوامی خبر رساں ادارے بلومبرگ سے گفتگو میں پاک فوج کے ترجمان میجر جنرل احمد شریف چوہدری نے کہا کہ “حالیہ معرکوں میں چینی ہتھیاروں نے خود کو نہایت مؤثر ثابت کیا ہے، تاہم پاکستان مغربی ممالک سے بھی جدید دفاعی ٹیکنالوجی حاصل کرنے کے لیے تیار ہے۔”
ذرائع کے مطابق، مئی کی جھڑپ میں پاکستان نے پہلی بار چینی ساختہ جے-10 سی لڑاکا طیاروں اور دیگر جدید نظاموں کو مکمل طور پر استعمال کیا۔ ان طیاروں نے بھارتی فضائیہ کے متعدد طیارے، بشمول فرانس کے بنائے گئے رافیل، مار گرائے۔
آئی ایس پی آر کے مطابق، پاکستان اب تک بھارت کے سات طیارے مار گرا چکا ہے، جب کہ اس سے پہلے چھ کی تصدیق کی گئی تھی۔ دلچسپ امر یہ ہے کہ امریکی صدر ڈونلڈ ٹرمپ نے بھی ورجینیا میں اپنے خطاب کے دوران اسی دعوے کی تصدیق کی۔
ڈی جی آئی ایس پی آر نے کہا کہ پاکستان کا کوئی طیارہ اس جھڑپ میں تباہ نہیں ہوا اور پاکستان کبھی اعداد و شمار بڑھا چڑھا کر پیش نہیں کرتا۔ انہوں نے مزید بتایا کہ پاکستان نے اپنے فضائی بیڑے میں چین کا زی-10 ایم ای اٹیک ہیلی کاپٹر بھی شامل کیا ہے، جو چین بھارت سرحد پر بھی استعمال کرتا ہے۔
جنرل احمد شریف نے کہا کہ پاکستان کی حکمت عملی ہمیشہ قابلِ اعتماد، کم خرچ اور مؤثر نظاموں پر مرکوز رہی ہے۔ انہوں نے واضح کیا کہ پاکستان بھارت کے ساتھ کسی ہتھیاروں کی دوڑ میں شامل نہیں۔
اعداد و شمار کے مطابق، گزشتہ سال پاکستان کا دفاعی بجٹ 10.2 ارب ڈالر تھا، جب کہ بھارت نے 86.1 ارب ڈالر دفاع پر خرچ کیے۔ تاہم جی ڈی پی کے لحاظ سے دونوں ممالک کا دفاعی خرچ تقریباً برابر رہا — پاکستان 2.7 فیصد اور بھارت 2.3 فیصد۔
