7 ستمبر یومِ فضائیہ ، پاکستان کے شاہینوں کی جرات و بہادری کی یادگار
ملک بھر میں آج یومِ فضائیہ بھرپور جوش و خروش کے ساتھ منایا جا رہا ہے۔ یہ دن 1965 کی جنگ میں پاک فضائیہ کی بے مثال جرات، مہارت اور قربانیوں کی یاد دلاتا ہے۔
یومِ فضائیہ کے موقع پر پاکستان ایئر فورس کے دستے شہید پائلٹ راشد منہاس کی قبر پر حاضری دے کر پھولوں کی چادر چڑھائیں گے اور سلامی پیش کریں گے۔
یہ دن ان تاریخی فضائی معرکوں کی یادگار ہے جب پاک فضائیہ کے شاہینوں نے دشمن پر بھرپور غلبہ حاصل کیا اور اپنی پیشہ ورانہ مہارت سے وطن کی فضائی حدود کو ناقابلِ تسخیر بنایا۔ 1965 کی جنگ میں پاک فضائیہ نے دشمن کے متعدد فضائی اڈوں کو نشانہ بنایا اور تعداد میں کہیں بڑی بھارتی فضائیہ کو شدید نقصان پہنچایا۔
یومِ فضائیہ کی تاریخ ایم ایم عالم جیسے عظیم ہیروز کے کارناموں سے روشن ہے۔ 7 ستمبر 1965 کو سرگودھا کے محاذ پر اسکواڈرن لیڈر محمد محمود عالم نے محض چند لمحوں میں دشمن کے پانچ بھارتی ہنٹر طیارے مار گرائے، جن میں سے چار صرف 30 سیکنڈ کے اندر تباہ ہوئے۔ یہ کارنامہ آج بھی دنیا کی فضائی تاریخ میں ایک منفرد ریکارڈ ہے اور پاکستان ایئر فورس کے وقار میں سنگ میل ثابت ہوا۔
جنگ کے آغاز پر پاک فضائیہ نے بھارتی ایئر بیس پٹھانکوٹ، ہلواڑہ اور جمنانگر پر کامیاب حملے کیے جبکہ لاہور اور سیالکوٹ کے محاذ پر زمینی افواج کو بھرپور فضائی مدد فراہم کر کے دشمن کے حملوں کو ناکام بنایا۔
7 ستمبر کا دن اس عہد کی تجدید ہے کہ پاکستان کے فضائی محافظ ہر لمحہ اپنی جانوں کی قربانی دے کر بھی وطن عزیز کے دفاع کے لیے تیار ہیں۔ یہ دن پاک فضائیہ کی عظیم قربانیوں، کامیابیوں اور پاکستانی قوم کے غیر متزلزل عزم کا مظہر ہے۔
