نبی آخر الزماں حضرت محمد مصطفیٰ ﷺ کا یومِ ولادت عقیدت و احترام کے ساتھ منایا جا رہا ہے
ملک بھر میں نبی آخر الزماں حضرت محمد مصطفیٰ ﷺ کا یومِ ولادت مذہبی جوش و جذبے اور عقیدت و احترام کے ساتھ منایا جا رہا ہے۔ وفاقی و صوبائی حکومتوں کی جانب سے عام تعطیل کا اعلان کیا گیا ہے۔
جشنِ میلاد النبی ﷺ کی مناسبت سے شہروں، قصبوں اور دیہات کی گلیاں، بازار اور عمارتیں سبز پرچموں، برقی قمقموں اور روشنیوں سے جگمگا رہی ہیں۔ مختلف شاہراہوں پر آرائشی دروازے اور محرابیں نصب کی گئی ہیں جبکہ مساجد کو بھی خوبصورت انداز میں سجایا گیا ہے۔ درود و سلام اور نعت خوانی کی محافل جاری ہیں اور فضا ذکرِ رسول ﷺ سے معطر ہے۔ مختلف علاقوں میں نیاز اور لنگر تقسیم کرنے کا بھی خصوصی انتظام کیا گیا ہے۔ پولیس اور قانون نافذ کرنے والے اداروں نے 12 ربیع الاول کے موقع پر فول پروف سیکیورٹی پلان بنایا ہے۔
وزیراعظم کا پیغام
وزیراعظم شہباز شریف نے اپنے خصوصی پیغام میں کہا کہ 12 ربیع الاول کا دن وہ مبارک گھڑی ہے جب 1500 برس قبل مکہ مکرمہ کی سرزمین پر نبی آخر الزماں حضرت محمد ﷺ کی ولادت باسعادت ہوئی، جس نے ظلمتوں کو نور میں بدل دیا اور انسانیت کو عدل، رحمت اور مساوات کی نئی راہیں دکھائیں۔
انہوں نے کہا کہ پاکستان سمیت دنیا بھر میں امسال 1500 ویں جشنِ ولادت کو “سالِ رحمت للعالمین ﷺ” کے طور پر منایا جا رہا ہے، جو اس عزم کی تجدید ہے کہ ہم اپنی اجتماعی زندگی، دستور اور قانون کو تعلیماتِ نبوی ﷺ کے مطابق ڈھالنے کے خواہاں ہیں۔
وزیراعظم نے کہا کہ نبی کریم ﷺ کی سیرت ہر میدان میں ہمارے لیے کامل نمونہ ہے، خواہ سیاست و حکومت ہو یا معیشت، عدل، انصاف اور معاشرتی اقدار، ہمیں رہنمائی ہمیشہ سیرتِ طیبہ سے حاصل کرنی چاہیے۔
انہوں نے کہا کہ بدلتے ہوئے دور میں نسلِ نو کو نبی اکرم ﷺ کی تعلیمات سے روشناس کرانا ناگزیر ہے تاکہ وہ علم، خیر اور امن کی طرف راغب ہوں۔ سیرتِ نبوی ﷺ ہمیں سکھاتی ہے کہ زبان بھلائی کے لیے استعمال ہو اور دنیا میں محبت، بھائی چارے اور امن کا پیغام پھیلایا جائے۔
وزیراعظم نے کہا کہ ہمیں پاکستان کو حقیقی معنوں میں سیرتِ طیبہ ﷺ کی عملی تعبیر بنانا ہے، فرقہ واریت، انتہاپسندی اور نفرت کو ختم کر کے اتحاد، ایثار اور بھائی چارے کو فروغ دینا ہوگا۔ پاکستان کو درپیش چیلنجز کا پائیدار حل اسی وقت ممکن ہے جب ہم نبی کریم ﷺ کی تعلیمات کو اپنے قومی کردار کا حصہ بنائیں۔
انہوں نے دعا کی کہ اللہ تعالیٰ پاکستان کو سلامت رکھے، اتحاد و یگانگت عطا فرمائے اور ہمیں نبی کریم ﷺ کی اطاعت اور محبت میں زندگی گزارنے کی توفیق دے۔
