سربراہ پاک بحریہ ایڈمرل نوید اشرف کو ترکیہ میں اعلیٰ عسکری اعزاز سے نوازا گیا
اسلام آباد / انقرہ: پاک بحریہ کے سربراہ ایڈمرل نوید اشرف کو ترکیہ کے سرکاری دورے کے دوران ترک مسلح افواج کے اعلیٰ عسکری اعزاز “لیجن آف میرٹ آف دی ترک آرمڈ فورسز” سے نوازا گیا۔ یہ اعزاز انہیں دونوں ممالک کے درمیان بحری دفاعی تعاون کے فروغ میں ان کی نمایاں خدمات کے اعتراف میں دیا گیا۔
ترک نیول فورسز کے ہیڈکوارٹرز پہنچنے پر ایڈمرل نوید اشرف کو گارڈ آف آنر پیش کیا گیا۔ بعد ازاں انہوں نے ترک نیول فورسز کے کمانڈر سے اہم ملاقات کی، جس میں دو طرفہ بحری تعاون، مشترکہ مشقوں اور خطے میں میری ٹائم سیکیورٹی سے متعلق اُمور پر تبادلہ خیال کیا گیا۔
دورے کے دوران نیول چیف نے ترک وزیر دفاع، چیف آف جنرل اسٹاف اور کمانڈر ترکش نیوی فلیٹ سے بھی الگ الگ ملاقاتیں کیں، جن میں دفاعی شراکت داری، تربیتی صلاحیتوں کے تبادلے اور علاقائی سیکیورٹی کے فروغ پر تفصیلی گفتگو کی گئی۔
ایڈمرل نوید اشرف نے استنبول نیول شپ یارڈ کا دورہ کر کے ملجم پراجیکٹ پر پیشرفت کا جائزہ لیا، جب کہ گولچک نیول بیس پر آبدوزوں کی تعمیراتی صلاحیتوں کا بھی مشاہدہ کیا۔
انہوں نے ترکش نیوی کے مختلف جہازوں اور نیول تنصیبات کا بھی معائنہ کیا۔ اس موقع پر ایڈمرل نوید اشرف نے جدید بحری ٹیکنالوجی کے معیار کو سراہا اور ترک بانی رہنما مصطفیٰ کمال اتاترک کے مزار پر پھول چڑھا کر خراجِ عقیدت پیش کیا۔
ترجمان پاک بحریہ کے مطابق سربراہ پاک بحریہ کا دورہ ترکیہ دو طرفہ بحری تعاون کو مزید وسعت دے گا اور دونوں برادر ممالک کے درمیان دفاعی روابط کو مضبوط بنانے میں اہم سنگ میل ثابت ہوگا۔
