یوم عاشورہ : کربلا ایک روشن چراغ کی مانند ہے، صدر پاکستان
یوم عاشورہ 1447 ہجری کے موقع پر صدر مملکت آصف علی زرداری کا قوم کو پیغام
یوم عاشورہ 1447 ہجری کے موقع پر صدر مملکت آصف علی زرداری نے قوم نام اپنے پیغام میں حضرت امام حسین رضی اللہ عنہ اور اُن کے جانثار ساتھیوں کی عظیم قربانی کو خراجِ عقیدت پیش کیا ہے۔
صدر نے کہا کہ یوم عاشورہ ہمیں قربانی، حق گوئی کا درس دیتا ہے۔
صدر مملکت نے اپنے پیغام میں کہا کہ یہ دن ہمیں نواسۂ رسول ﷺ حضرت امام حسینؓ اور اُن کے جاں نثار رفقاء کی عظیم شہادت کی یاد دلاتا ہے. جو باطل کے خلاف ایک ابدی جدوجہد کی علامت ہے۔
انھوں نے کہا کہ کربلا ایک روشن چراغ کی مانند ہے ، جو ہر دور کے اندھیروں میں حق اور سچائی کا راستہ دکھاتا ہے۔ امام حسینؓ کی شہادت ایک الٰہی مشن تھا جس کی بنیاد صداقت، عدل اور رضائے الٰہی پر تھی۔
انہوں نے کہا کہ کربلا کا میدان ضمیر، کردار اور دین کی اصل روح کا امتحان تھا، جہاں امام حسینؓ اور ان کے رفقاء نے بھوک، پیاس اور موت کی شدت کو قبول کر کے تاریخ انسانیت کو ایسا سبق دیا جو رہتی دنیا تک یاد رکھا جائے گا۔
صدر آصف علی زرداری نے کہا کہ آج ملک کو درپیش چیلنجز کے تناظر میں ہمیں بطور قوم حسینی کردار اپنانے کی ضرورت ہے۔ انہوں نے عہد کیا کہ ہم پاکستان کو امام حسینؓ کے پیغامِ حریت و عدل کا مظہر بنائیں گے . بھائی چارے، محبت، رواداری اور قومی یکجہتی کو فروغ دیں گے۔
آخر میں صدر مملکت نے دعا کی کہ اللہ تعالیٰ ہمیں امام حسینؓ کے راستے پر چلنے کی توفیق عطا فرمائے اور ہمارے دلوں میں ایمانی غیرت، جرات، تقویٰ، صبر اور ایثار پیدا فرمائے۔ انہوں نے وطن عزیز کے لیے استحکام، خوشحالی اور باہمی محبت کی دعا بھی کی۔
