بلوچستان کے ضلع قلات میں سکیورٹی فورسز نے انٹیلی جنس اطلاعات کی بنیاد پر کارروائی کرتے ہوئے بھارتی حمایت یافتہ تنظیم فتنۃ الہندوستان کے چار دہشتگردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق یہ آپریشن یکم نومبر کی رات کیا گیا، جو دہشتگردوں کی موجودگی کی مصدقہ اطلاع پر عمل میں لایا گیا تھا۔ کارروائی کے دوران دہشتگردوں کے ٹھکانے کو مؤثر انداز میں نشانہ بنایا گیا، جس کے نتیجے میں چار دہشتگرد مارے گئے جو مختلف تخریبی اور دہشتگردانہ کارروائیوں میں ملوث تھے۔
ترجمان آئی ایس پی آر کے مطابق آپریشن کے دوران ہتھیار اور گولہ بارود بھی برآمد ہوا، جبکہ علاقے میں کلیئرنس آپریشن جاری ہے تاکہ کسی بھی بھارتی سرپرستی یافتہ دہشتگرد کو تلاش کر کے خاتمہ کیا جا سکے۔ بیان میں کہا گیا ہے کہ عزمِ استحکام ویژن کے تحت انسدادِ دہشتگردی کی مہم پوری قوت سے جاری ہے اور ملک سے غیرملکی حمایت یافتہ دہشتگردی کے مکمل خاتمے تک یہ عمل جاری رہے گا۔
صدر، وزیراعظم اور وزیرداخلہ کا خراجِ تحسین
صدرِ مملکت آصف علی زرداری نے کامیاب آپریشن پر سکیورٹی فورسز کو خراجِ تحسین پیش کرتے ہوئے کہا کہ بھارتی پشت پناہی یافتہ دہشتگردوں کے خاتمے سے قومی سلامتی کو تقویت ملی ہے۔ انہوں نے قوم کے عزم کا اظہار کرتے ہوئے کہا کہ وطن دشمن عناصر کے خلاف کارروائیاں جاری رہیں گی۔
وزیراعظم شہباز شریف نے بھی قلات آپریشن پر فورسز کی کارکردگی کو سراہتے ہوئے کہا کہ چار بھارتی حمایت یافتہ دہشتگردوں کا خاتمہ فورسز کی پیشہ ورانہ مہارت کا ثبوت ہے۔ انہوں نے عزم ظاہر کیا کہ دہشتگردی کے مکمل خاتمے تک جنگ جاری رہے گی۔
وفاقی وزیرداخلہ محسن نقوی نے بھی فورسز کی بروقت کارروائی کو سراہتے ہوئے کہا کہ انڈین اسپانسرڈ دہشتگردوں کے ناپاک عزائم کو ناکام بنا کر قوم کو ایک مضبوط پیغام دیا گیا ہے کہ پاکستان میں کسی دشمن کو پناہ نہیں ملے گی۔
