کابل: افغانستان کے مختلف علاقوں میں آنے والے شدید زلزلے سے متعدد عمارتیں منہدم ہو گئیں، 20 افراد جاں بحق جبکہ 320 سے زائد زخمی ہو گئے۔
زلزلہ ہندوکش کے پہاڑی خطے میں آیا جس کی شدت ریکٹر اسکیل پر 6.4 ریکارڈ کی گئی۔
زلزلہ پیما مرکز کے مطابق زلزلے کا مرکز مزار شریف سے تقریباً 45 کلومیٹر دور اور گہرائی 12 کلومیٹر تھی۔
مزار شریف سمیت قندوز، بلخ، تخار اور کابل میں زلزلے کے شدید جھٹکے محسوس کیے گئے۔
زلزلے کے باعث درجنوں مکانات اور عمارتیں زمین بوس ہو گئیں جبکہ امدادی ٹیموں نے متاثرہ علاقوں میں سرچ آپریشن شروع کر دیا ہے۔
خبر ایجنسیوں کے مطابق، زلزلے کے جھٹکے پاکستان، ازبکستان، تاجکستان اور ایران میں بھی محسوس کیے گئے۔
افغان حکام نے ہلاکتوں میں اضافے کا خدشہ ظاہر کیا ہے، کیونکہ کئی دیہی علاقوں تک رسائی میں مشکلات درپیش ہیں۔
رات کے وقت آنے والے زلزلے کے باعث شہری گھروں سے باہر نکل آئے اور کئی گھنٹوں تک خوف کے عالم میں کھلے مقامات پر رہے۔
یاد رہے کہ 31 اگست 2025 کو افغانستان میں آنے والے زلزلے میں دو ہزار سے زائد افراد ہلاک اور سیکڑوں زخمی ہوئے تھے۔
