لوئر کرم میں مسافر گاڑی پر نامعلوم افراد کی اندھا دھند فائرنگ، 7 افراد جاں بحق
ڈیرہ اسماعیل خان (ویب ڈیسک) خیبر پختونخوا کے ضلع کرم کی تحصیل لوئر کرم میں دہشت گردی کا افسوسناک واقعہ پیش آیا، جہاں نامعلوم افراد نے مسافر گاڑی پر اندھا دھند فائرنگ کر کے 7 افراد کو جاں بحق کر دیا۔
پولیس کے مطابق یہ حملہ احمد خان کلے کے قریب ہوا، فائرنگ کرنے والے ملزمان موقع سے فرار ہو گئے۔ واقعے کے بعد پولیس اور سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔
جاں بحق افراد کی لاشوں کو ٹی ایچ کیو اسپتال منتقل کر دیا گیا ہے، جبکہ تحقیقات کا عمل جاری ہے۔ ڈی پی او کرم ملک حبیب نے کہا کہ یہ واقعہ علاقے کے امن کو سبوتاژ کرنے کی مذموم کوشش ہے۔
علاقے سے رکن قومی اسمبلی انجینئر حمید حسین نے واقعے کی شدید مذمت کرتے ہوئے کہا کہ پرامن بستی احمد خان کلے میں دہشت گردی شرپسندوں کی کھلی سازش ہے جسے کسی صورت کامیاب نہیں ہونے دیا جائے گا۔
