وفاقی وزیر داخلہ محسن نقوی نے واضح کیا ہے کہ اظہارِ رائے کی آزادی کا ہرگز یہ مطلب نہیں کہ جھوٹی خبریں پھیلائی جائیں۔ انہوں نے اعلان کیا کہ سوشل میڈیا اور دیگر ذرائع پر فیک نیوز کے خلاف ملک گیر کریک ڈاؤن شروع کیا جا رہا ہے۔
میڈیا سے گفتگو کرتے ہوئے محسن نقوی کا کہنا تھا کہ ملک بھر میں غیر قانونی طور پر مقیم افغان شہریوں کا انخلا ہر صورت یقینی بنایا جائے گا۔ ان کے مطابق حالیہ دہشتگرد حملوں میں ملوث افراد کی شناخت افغان شہریوں کے طور پر ہوئی ہے جن میں ایف سی پر حملہ کرنے والے تین ملزمان اور اسلام آباد کچہری کے حملہ آور بھی شامل ہیں۔
انہوں نے خبردار کیا کہ جن افغان باشندوں کو واپس بھیجا جا چکا ہے، وہ دوبارہ پاکستان میں داخل ہوئے تو انہیں گرفتار کرکے قانونی کارروائی کی جائے گی۔ خیبر پختونخوا میں افغان کیمپ ختم کرنے کا عمل بھی جاری ہے۔
محسن نقوی نے کہا کہ قومی سلامتی کے معاملات میں کوئی صوبہ اپنی الگ پالیسی نہیں اپنا سکتا، ایسے فیصلے ہمیشہ ملک گیر حکمتِ عملی کے تحت ہوتے ہیں۔
سوشل میڈیا پر پھیلنے والی غلط معلومات کے حوالے سے انہوں نے کہا کہ 90 فیصد خبریں جھوٹی ہوتی ہیں اور اب ان کے خلاف سخت ایکشن لیا جائے گا۔ ان کا کہنا تھا کہ سوشل میڈیا پر تذلیل کی اجازت نہیں دی جائے گی اور نہ ہی قومی سلامتی پر کسی قسم کا سمجھوتہ کیا جائے گا۔
بیرونِ ملک بیٹھے افراد کے حوالے سے محسن نقوی نے کہا کہ انہیں بھی جلد واپس لایا جائے گا تاکہ وہ اپنے بیانات کا جواب عدالتوں میں دے سکیں۔
