سیکرٹری داخلہ و نارکوٹس کنٹرول نے وفاقی تحقیقاتی ادارے FIA کے متعدد افسران و اہلکاروں کے خلاف محکمانہ احتسابی کارروائیاں مکمل کرتے ہوئے مختلف سزائیں جاری کر دیں۔
یونان کشتی حادثہ 2023 کے علاوہ مختلف کیسز میں غفلت، بدعنوانی اور غیر پیشہ ورانہ طرزِ عمل ثابت ہونے پر کئی افسران کو ملازمت سے برطرف کر دیا گیا جبکہ متعدد اہلکاروں کی اپیلیں بھی مسترد کر دی گئیں۔
حکومتی ذرائع کے مطابق سیکرٹری داخلہ نے ہر کیس کا تفصیلی جائزہ لیا۔ یونان کشتی حادثہ 2023 میں غفلت ثابت ہونے پر کراچی ایئرپورٹ کے ایک ڈپٹی ڈائریکٹر اور دو اسسٹنٹ ڈائریکٹرز کو ملازمت سے فارغ کر دیا گیا۔ اسی نوعیت کے الزامات پر فیصل آباد ایئرپورٹ کے ایک اسسٹنٹ ڈائریکٹر کو بھی برطرف کیا گیا۔
ملتان ایئرپورٹ پر تعینات ایک ڈپٹی ڈائریکٹر کو انسانی اسمگلرز سے مبینہ روابط کے الزام میں تین سال کے لیے عہدے اور تنخواہ میں تنزلی کی سزا سنائی گئی۔ ناقص تفتیش پر دو سینیئر انویسٹی گیٹرز اور غفلت پر ایک اسسٹنٹ ڈیٹا بیس ایڈمنسٹریٹر کو بھی عہدے سے ہٹا دیا گیا۔
چار اسسٹنٹ ڈائریکٹرز اور ایک انسپکٹر کو غیر حاضری، غفلت اور ناقص تفتیش پر بنیادی پے اسکیل میں ایک سے تین سال کی تنزلی کی سزا دی گئی، جبکہ Islamabad Airport پر قیدی کو مس ہینڈل کرنے پر ایک اسسٹنٹ ڈائریکٹر اور ایک انسپکٹر کو سینشور کی سزا دی گئی۔
مزید برآں، سیکرٹری داخلہ نے چھ سب انسپکٹرز، ایک اے ایس آئی، تین ہیڈ کانسٹیبلز اور پانچ کانسٹیبلز کی اپیلیں مسترد کرتے ہوئے برطرفی کی سزاؤں کو برقرار رکھا۔ غیر حاضری کے مرتکب ایل ڈی سی کی اپیل بھی خارج کر دی گئی۔
البتہ ایک سپرنٹنڈنٹ اور ایک سب انسپکٹر کی اپیل پر پروموشن روکنے کی سزا کو تبدیل کرتے ہوئے اسے سینشور میں بدل دیا گیا۔
