پاکستان کے محکمہ موسمیات نے بلوچستان کے 12 اضلاع کے لیے خشک سالی (Drought Watch) جاری کرتے ہوئے صوبائی حکومت کو پیشگی اقدامات کرنے کی ہدایت کی ہے۔
محکمہ موسمیات کے مطابق بلوچستان کا موسم عموماً خشک اور نیم خشک ہے، جہاں بارشیں نہ صرف کم بلکہ غیر متوقع ہوتی ہیں۔ صوبے کے جنوبی اور مغربی علاقے گرمیوں کی مون سون بارشوں سے زیادہ متاثر نہیں ہوتے بلکہ سردیوں کی بارشوں پر انحصار کرتے ہیں۔
مئی سے اکتوبر 2025 کے دوران صوبے میں بارشوں کی کمی 79 فیصد تک ریکارڈ کی گئی ہے، جبکہ مسلسل خشک دنوں کی تعداد میں خطرناک حد تک اضافہ ہوا ہے۔ یہ صورتحال پانی کی شدید کمی اور زمین کی زرخیزی پر براہ راست اثر ڈال سکتی ہے۔
رپورٹ کے مطابق نومبر 2025 سے جنوری 2026 تک بلوچستان کے ان علاقوں میں بارش معمول سے کم اور درجہ حرارت معمول سے زیادہ رہنے کا امکان ہے، جس سے خشک سالی مزید سنگین ہو سکتی ہے۔
خشک سالی کے خطرے سے دوچار اضلاع میں چاغی، گوادر، کیچ، خاران، مستونگ، نوشکی، پشین، پنجگور، قلعہ عبداللہ، کوئٹہ اور واشک شامل ہیں۔ ان علاقوں میں آبپاشی کے لیے پانی کی قلت سے فصلیں متاثر ہونے کا خدشہ ہے، جبکہ مویشیوں اور زراعت پر بھی منفی اثرات پڑ سکتے ہیں۔
محکمہ موسمیات نے متعلقہ اداروں، کسانوں اور ضلعی انتظامیہ کو ہدایت کی ہے کہ وہ خشک سالی کے اثرات کو کم کرنے کے لیے پیشگی منصوبہ بندی کریں، پانی کے ذخائر کا مؤثر استعمال یقینی بنائیں اور کمیونٹی سطح پر آگاہی مہم تیز کریں تاکہ ممکنہ نقصانات سے بچا جا سکے۔,
