بلوچستان کی قومی شاہراہوں پر 31 اگست 2025ء کو پیش آنے والے 44 ٹریفک حادثات میں 77 افراد زخمی ہوگئے۔
میڈیکل ایمرجنسی ریسپانس سینٹر کی رپورٹ کے مطابق سب سے زیادہ حادثات ژوب اور خضدار کی شاہراہوں پر رپورٹ ہوئے۔ این-50 ژوب پر 11 حادثات میں 22 افراد زخمی ہوئے جبکہ این-25 خضدار میں 10 حادثات کے نتیجے میں 15 افراد متاثر ہوئے۔
رپورٹ کے مطابق این-25 مستونگ پر 4 حادثات میں 5 افراد زخمی ہوئے۔ قلات، زیارت، ژوب اور سبی کی شاہراہوں پر 2، 2 حادثات ہوئے جن میں مجموعی طور پر 12 افراد زخمی ہوئے۔ مزید برآں، لسبیلہ، وندر، سرانان، شیرانی اور سوراب سمیت کیچ، پنجگور، واشک، بارکھان اور نوشکی کی شاہراہوں پر ایک، ایک حادثہ رپورٹ ہوا، جن میں 20 افراد زخمی ہوئے۔
متعلقہ حکام نے حادثات کی بڑی وجوہات تیز رفتاری، سڑکوں کی خستہ حالی اور قوانین کی خلاف ورزی کو قرار دیا ہے۔ شہریوں کا مطالبہ ہے کہ قومی شاہراہوں کی مرمت اور ٹریفک قوانین پر سختی سے عمل درآمد کو یقینی بنایا جائے تاکہ قیمتی انسانی جانوں کا تحفظ ممکن ہو سکے۔
