پاکستان نیوی نے شمالی بحیرۂ عرب میں ایک جامع بحری مشق کے دوران زمین سے فضا میں مار کرنے والے میزائل کا کامیاب تجربہ کیا، جس کے ذریعے اپنی آپریشنل تیاری اور جنگی صلاحیتوں کا بھرپور مظاہرہ کیا گیا۔
آئی ایس پی آر کے مطابق جدید بحری جنگی تقاضوں کے پیش نظر اس مشق میں روایتی اور بغیر پائلٹ نظاموں کی صلاحیتوں کو کامیابی سے آزمایا گیا۔ مشق کے دوران عمودی لانچنگ سسٹم سے ایل وائی-80 (این) زمین سے فضا میں مار کرنے والے میزائل کا کامیاب لائیو فائر کیا گیا، جس نے طویل فاصلے پر فضائی ہدف کو کامیابی سے نشانہ بنایا۔
مشق میں جدید لوئٹرنگ میونیشن کے ذریعے سطحِ آب کے اہداف کو بھی درستگی کے ساتھ تباہ کیا گیا، جس سے پاکستان نیوی کی پریسیژن اسٹرائیک صلاحیتوں کی تصدیق ہوئی۔ اس کے علاوہ بغیر پائلٹ سطحی بحری جہاز (Unmanned Surface Vessel) کے کھلے سمندر میں کامیاب آزمائشی تجربات بھی کیے گئے، جن میں تیز رفتاری، پھرتی، درست نیویگیشن اور خراب موسمی حالات میں مؤثر کارکردگی کا مظاہرہ کیا گیا۔
مشق کا مشاہدہ کمانڈر پاکستان فلیٹ نے کیا، جبکہ چیف آف دی نیول اسٹاف ایڈمرل نوید اشرف نے افسران اور جوانوں کی پیشہ ورانہ مہارت کو سراہتے ہوئے کہا کہ پاکستان نیوی ہر صورت ملکی بحری دفاع اور قومی سمندری مفادات کے تحفظ کو یقینی بناتی رہے گی۔
