پاک امریکا تعلقات تاریخ کی مضبوط ترین سطح پر، اربوں ڈالر کی سرمایہ کاری جلد متوقع

وجودہ دور میں پاکستان اور امریکا کے تعلقات اپنی تاریخ کی مضبوط ترین سطح پر پہنچ گئے ہیں، جس کے نتیجے میں ملک میں اربوں ڈالر کی سرمایہ کاری جلد متوقع ہے۔

یہ بات امریکی سفارت خانے کے منسٹر کاؤنسلر برائے پبلک ڈپلومیسی اینڈی ہیلس نے کہی۔ انہوں نے بتایا کہ فیلڈ مارشل سید عاصم منیر، صدر ڈونلڈ ٹرمپ اور وزیرِاعظم شہباز شریف کے درمیان مضبوط، خوشگوار اور باہمی احترام پر مبنی تعلقات دونوں ممالک کے درمیان تعلقات کی مستحکم بنیاد کی عکاسی کرتے ہیں۔

اینڈی ہیلس نے کہا کہ امریکی حکومت کے ایگزم بینک کے اشتراک سے پاکستان کے اہم معدنی منصوبے ریکوڈک میں کئی ارب ڈالر کی سرمایہ کاری کا فیصلہ کیا گیا ہے۔ مائنز اینڈ منرلز کے شعبے میں امریکی نجی کمپنیوں کی دلچسپی تیزی سے بڑھ رہی ہے جو پاک امریکا اقتصادی تعلقات میں اضافے کی علامت ہے۔

انہوں نے مزید کہا کہ امریکی کمپنیاں جہاں سرمایہ کاری کرتی ہیں وہاں مقامی باصلاحیت افرادی قوت کو ترجیح دیتی ہیں اور روزگار کے نئے مواقع پیدا کرتی ہیں۔ سرمایہ کاری کے حتمی فیصلے نجی کمپنیوں کی خود مختاری میں ہیں، تاہم ریکوڈک منصوبے پر امریکی سفارت خانے کی غیر معمولی دلچسپی ہے۔

اینڈی ہیلس نے تعلیم کو بھی پاک امریکا تعلقات کا بنیادی ستون قرار دیتے ہوئے بتایا کہ پاکستان میں فل برائٹ پروگرام کو 75 سال مکمل ہو چکے ہیں اور اب تک 9 ہزار سے زائد پاکستانی طلبہ امریکا کی ممتاز جامعات سے تعلیم حاصل کر چکے ہیں۔ انہوں نے پاکستانی نوجوانوں کو یو ایس ای ایف پی اور ایجوکیشن یو ایس اے کے مفت تعلیمی وسائل سے بھرپور فائدہ اٹھانے کی ترغیب دی۔

اینڈی ہیلس نے مزید کہا کہ موجودہ حالات پاکستان اور امریکا کے تعلقات کی مضبوط بنیادوں کی عکاس ہیں اور صدر ٹرمپ متعدد مواقع پر فیلڈ مارشل سید عاصم منیر اور وزیرِاعظم شہباز شریف کے بارے میں مثبت بیانات دے چکے ہیں۔