پاکستان ہمارا سچا اتحادی ہے، دوستی ہمیشہ رہے گی، صدر اردوان

ترکیہ کے صدر رجب طیب اردوان نے پاکستان کو ترکیہ کا سچا اور قابلِ اعتماد اتحادی قرار دیتے ہوئے کہا ہے کہ دونوں ممالک کے درمیان دوستی ہمیشہ قائم رہے گی۔ ان کا کہنا تھا کہ پاک ترک تعلقات وقت کے ساتھ مزید مضبوط اور مستحکم ہوتے جائیں گے۔

بحری پلیٹ فارمز کی شمولیت سے متعلق ایک تقریب سے خطاب کرتے ہوئے صدر اردوان نے کہا کہ تمام کامیاب آزمائشوں کے بعد جدید جنگی جہاز PNS خیبر پاکستان بحریہ کے حوالے کیا جا رہا ہے۔

انہوں نے بتایا کہ پاکستان بحریہ کی ضروریات کو مدنظر رکھتے ہوئے چار ملگیم (MILGEM) جنگی جہازوں کی تعمیر کا معاہدہ کیا گیا تھا، جس پر کامیابی سے عمل درآمد جاری ہے۔ ان کے مطابق پہلا جہاز PNS بابر 24 مئی 2024 کو پاکستان کے حوالے کیا جا چکا ہے، جبکہ تیسرا جہاز PNS بدر جون 2026 کے اختتام تک اور چوتھا جہاز PNS طارق 2027 کی پہلی سہ ماہی میں پاکستان بحریہ کے حوالے کیا جائے گا۔

صدر اردوان نے کہا کہ جدید ٹیکنالوجی سے لیس یہ جنگی جہاز پاکستان بحریہ کی دفاعی صلاحیتوں میں نمایاں اضافہ کریں گے۔ انہوں نے اپنے خطاب کے اختتام پر اس عزم کا اعادہ کیا کہ پاکستان اور ترکیہ کے تعلقات تاریخی، برادرانہ اور ناقابلِ شکست ہیں اور مستقبل میں مزید فروغ پائیں گے۔