نائب وزیر اعظم اور وزیر خارجہ اسحاق ڈار نے واضح کیا ہے کہ صومالی لینڈ صومالیہ کا اٹوٹ اور غیر متنازع حصہ ہے اور کوئی بھی بیرونی ریاست یا ادارہ اس حقیقت کو نہ قانونی طور پر بدل سکتا ہے اور نہ اخلاقی جواز رکھتا ہے۔
جدہ میں او آئی سی وزرائے خارجہ کونسل کے غیر معمولی اجلاس سے خطاب کرتے ہوئے اسحاق ڈار نے کہا کہ اسرائیلی وزیر خارجہ کا صومالی لینڈ کا دورہ انتہائی تشویشناک ہے اور یہ اقدام صومالیہ کی بین الاقوامی طور پر تسلیم شدہ سرحدوں پر براہِ راست حملہ ہے۔
انہوں نے کہا کہ پاکستان صومالیہ کی خودمختاری، وحدت اور علاقائی سالمیت کی مکمل حمایت کرتا ہے اور اسرائیل کی اس غیرقانونی اور غیرحقیقی کارروائی کی سخت مذمت کرتا ہے۔ اسحاق ڈار کے مطابق پاکستان نے اقوام متحدہ سمیت تمام عالمی فورمز پر اس اقدام کے خلاف آواز بلند کی ہے۔
نائب وزیر اعظم نے مزید کہا کہ اسرائیلی اقدام بین الاقوامی قانون اور اقوام متحدہ کے منشور کی صریح خلاف ورزی ہے اور اس کے ہارن آف افریقا اور بحیرہ احمر کے امن و استحکام پر منفی اثرات مرتب ہو سکتے ہیں۔ انہوں نے بتایا کہ پاکستان نے او آئی سی ممالک کے ساتھ مل کر اسرائیلی اقدام کو مشترکہ بیان میں مسترد کیا ہے۔
غزہ کی صورتحال پر بات کرتے ہوئے اسحاق ڈار نے کہا کہ غزہ میں جنگ کا فوری خاتمہ اور انسانی امداد کی بلا رکاوٹ فراہمی ناگزیر ہے۔ انہوں نے زور دیا کہ کسی بھی قسم کی جبری بے دخلی بین الاقوامی قانون کی خلاف ورزی ہے اور پاکستان فلسطینی عوام کے حقِ خودارادیت کی مکمل حمایت جاری رکھے گا۔
اسحاق ڈار نے او آئی سی پر زور دیا کہ وہ مسئلہ کشمیر کے منصفانہ حل کے لیے بھی عملی اور مؤثر اقدامات کرے۔
