وفاقی وزیر داخلہ محسن نقوی اور وزیر مملکت برائے داخلہ طلال چوہدری نے علامہ اقبال انٹرنیشنل ایئرپورٹ کا دورہ کیا جہاں انہوں نے بیرونِ ملک جانے والے مسافروں کے امیگریشن عمل کا تفصیلی جائزہ لیا۔
دورے کے دوران وزرا نے امیگریشن کاؤنٹرز پر موجود عملے کی کارکردگی کا مشاہدہ کیا اور مسافروں سے براہِ راست گفتگو کرتے ہوئے امیگریشن مراحل سے متعلق رائے اور شکایات معلوم کیں۔ وفاقی وزیر داخلہ نے امیگریشن کاؤنٹر پر تعینات وفاقی تحقیقاتی ادارہ کے اہلکار کی بہتر کارکردگی کو سراہتے ہوئے اسے شاباش دی۔
اس موقع پر ایک مسافر نے چیکنگ میں تاخیر کے باعث بورڈنگ بند ہونے کی شکایت کی، جس پر وزیر داخلہ نے فوری نوٹس لیتے ہوئے متعلقہ حکام کو کویت جانے والے مسافر کی فوری بورڈنگ کرانے کی ہدایت جاری کی۔
مسافروں نے بتایا کہ چند ہی منٹوں میں امیگریشن کا عمل مکمل ہو رہا ہے جو ایک خوش آئند پیش رفت ہے۔ وزیر داخلہ محسن نقوی نے کہا کہ پاکستان کی عزت اور مسافروں کی سہولت اولین ترجیح ہے اور کسی بھی مسافر کو بلاجواز سفر سے نہیں روکا جائے گا۔
انہوں نے واضح کیا کہ پیشہ ور بھکاریوں یا نامکمل دستاویزات رکھنے والوں کو بیرونِ ملک جانے کی اجازت نہیں دی جا سکتی کیونکہ ایسے عناصر پاکستان کی بدنامی کا باعث بنتے ہیں۔ وزیر داخلہ نے امیگریشن نظام کو مزید مؤثر، شفاف اور مسافروں کے لیے آسان بنانے کی ہدایات بھی جاری کیں۔ اس موقع پر ریجنل ڈائریکٹر ایف آئی اے لاہور علی ضیاء اور ڈپٹی ڈائریکٹر ایئرپورٹ اویس بھی موجود تھے۔
