بانیٔ پاکستان قائداعظم محمد علی جناح کا 149واں یومِ پیدائش آج ملک بھر میں عقیدت، احترام اور قومی جوش و جذبے کے ساتھ منایا جا رہا ہے۔ اس موقع پر ملک بھر میں عام تعطیل ہے، جبکہ کراچی میں مزارِ قائد پر گارڈز کی تبدیلی کی پروقار تقریب منعقد ہوئی۔
یومِ قائداعظمؒ کے موقع پر مزارِ قائد پر ہونے والی تقریب میں پاک فوج کے چاق و چوبند دستے نے سلامی پیش کی، جبکہ فوجی کیڈٹس نے گارڈز کے فرائض سنبھالے۔ تقریب کے مہمانِ خصوصی میجر جنرل افتخار حسین چوہدری (ہلالِ امتیاز) تھے۔
بابائے قوم کے یومِ ولادت کے موقع پر ملک بھر میں سرکاری اور غیر سرکاری سطح پر مختلف تقریبات کا انعقاد کیا جا رہا ہے۔ ان تقریبات میں قائداعظمؒ کی مسلمانوںِ برصغیر کے لیے کی گئی انتھک جدوجہد اور قیامِ پاکستان میں ان کے تاریخی کردار کو خراجِ عقیدت پیش کیا جا رہا ہے۔ تعلیمی اداروں، سرکاری دفاتر اور مختلف تنظیموں کی جانب سے سیمینارز اور خصوصی پروگرامز منعقد کیے گئے ہیں۔
قائداعظم محمد علی جناحؒ 25 دسمبر 1876 کو کراچی میں پیدا ہوئے۔ وہ ایک ممتاز وکیل اور مدبر سیاست دان تھے، جنہوں نے اپنی غیر معمولی قیادت، سیاسی بصیرت اور اصولی جدوجہد کے ذریعے ایک آزاد اور خودمختار پاکستان کے خواب کو حقیقت میں بدلا۔
ایمان، اتحاد اور تنظیم قائداعظمؒ کی فکر اور فلسفۂ حیات کا خلاصہ تھے۔ ان کا وژن ایک ایسے پاکستان کا تھا جہاں ہر شہری کو مساوی حقوق، آزادی اور انصاف میسر ہو۔ انہوں نے اپنے کردار اور عمل سے ثابت کیا کہ دیانت دار اور اصولی قیادت قوموں کی تقدیر بدل سکتی ہے۔
برصغیر کی سیاست میں جواہر لعل نہرو، موہن داس گاندھی اور سردار ولبھ بھائی پٹیل جیسے قدآور رہنماؤں کی موجودگی میں قائداعظمؒ نے مسلمانوں کے لیے ایک الگ وطن حاصل کر کے تاریخ کا رخ موڑ دیا۔ دو قومی نظریے کی بنیاد پر حاصل کی گئی یہ آزادی ایک عظیم قومی جدوجہد کا ثمر ہے۔
اس موقع پر افواجِ پاکستان، آرمی چیف اور چیف آف ڈیفنس فورسز فیلڈ مارشل عاصم منیر نے بھی بابائے قوم کو خراجِ عقیدت پیش کرتے ہوئے ایک مضبوط، خودمختار، جمہوری اور خوشحال پاکستان کے قائداعظمؒ کے وژن سے غیر متزلزل وابستگی کا اعادہ کیا۔
وزیراعظم شہباز شریف نے اپنے پیغام میں کہا کہ قائداعظمؒ نے بلا تفریق رنگ و نسل، مذہبی ہم آہنگی، معاشرتی رواداری اور انصاف کے اصولوں کا درس دیا، جو آج بھی قوم کے لیے مشعلِ راہ ہیں۔
بانی پاکستان کو خراج عقیدت؛ آئی ایس پی آر کا نیا ملی نغمہ ’پیغام قائد‘ جاری
یومِ قائد کے موقع پر انٹر سروسز پبلک ریلیشنز (آئی ایس پی آر) نے بانیٔ پاکستان قائداعظم محمد علی جناح کو خراجِ عقیدت پیش کرنے کے لیے نیا ملی نغمہ ’’پیغامِ قائد‘‘ جاری کر دیا۔
جاری کردہ ملی نغمہ قائداعظمؒ کے فرمودات، قیامِ پاکستان کے لیے دی گئی قربانیوں اور تاریخی جدوجہد کی بھرپور عکاسی کرتا ہے، جبکہ یہ نغمہ دشمن عناصر کے عزائم کے خلاف قومی عزم، استقامت اور اتحاد کا پیغام بھی اجاگر کرتا ہے۔
آئی ایس پی آر کے مطابق اس نغمے میں قائداعظمؒ کی بصیرت افروز قیادت اور اصولی جدوجہد کو شاندار انداز میں خراجِ تحسین پیش کیا گیا ہے۔
ملی نغمہ ’’پیغامِ قائد‘‘ قائداعظمؒ کے افکار کی تجدید، قومی خودداری اور ایک محفوظ و باوقار پاکستان کے روشن مستقبل کی علامت ہے، جبکہ یہ یومِ قائد پر بابائے قوم سے قوم کی والہانہ عقیدت اور وابستگی کی ترجمانی بھی کرتا ہے۔
