وفاقی وزیر داخلہ محسن نقوی اور گورنر خیبرپختونخوا فیصل کریم کنڈی کے درمیان اہم ملاقات ہوئی، جس میں صوبے میں امن و امان کی صورتحال پر تفصیلی تبادلہ خیال کیا گیا۔
گورنر خیبرپختونخوا نے صوبے کو درپیش سکیورٹی چیلنجز اور سرحدی علاقوں میں جاری خوارجیوں کے خلاف آپریشنز سے وفاقی وزیر کو آگاہ کیا۔
وزیر داخلہ محسن نقوی نے خیبرپختونخوا میں قیام امن کو اولین ترجیح قرار دیتے ہوئے یقین دلایا کہ وفاقی حکومت صوبے کو ہر ممکن تعاون فراہم کرے گی۔ انہوں نے دہشتگردی کے خلاف عوام کی قربانیوں کو سراہا اور کہا کہ فتنے، خوارجیوں اور سہولت کاروں کے خلاف کسی قسم کی رعایت نہیں برتی جائے گی۔
گورنر فیصل کریم کنڈی نے مشترکہ اور مربوط اقدامات کے ذریعے دہشتگردی کے خاتمے کی ضرورت پر زور دیا اور کہا کہ وفاقی تعاون کے بغیر صوبے میں امن و امان قائم کرنا ممکن نہیں۔
